Түҥ былыр Саха сиригэр төрүү -үөскүү сылдьыбыт кыыллары төрүт ыырдарыгар ыытыы, сөргүтүү тосхолунан, сотору кэминэн Саха сирин хотугулуу-илин өттүгэр бизоннар иккис үөрдэрэ кэлэрэ күүтүллэр.
Маҥнайгы үөр 2019 сыллаахха ыраах Данияттан тиэллэн кэлэн ыытыллыбыта. Хотугу Эмиэрикэттэн силистээх, аарыма түҥ былыргы кыыл Саха сиригэр бэркэ уутуйан үөскээтэ, олохтоохтук силис-мутук тардыан сөбүн ылрылхайдык дакаастаата. Тыйыс айылҕалаах дойдубут уорааннаах тымныытын этэҥҥэ туораан, бу туйахтаах аарымалар плейстоцен үйэтигэр сэлиилэри кытары халыҥ үөрүнэн мэччийэн, күөх ходуһаларыгар көҥүл таалалаан ааспыттара диэн учуонайдарбыт сабаҕалааһыннара дьиҥ олоххо бигэргэтилиннэ.
“Саха сиригэр иккис бизон үөрүн биһиги Латвиятттан быйыл аҕаларбыт буолуо, онно соторутааҕыта истиэп бизоннарын иитэр ферма аһыллыбыта”, – диэн Плейстоценовай паарка салайааччыта Никита Зимов ТАСС ааҕыныстыбаҕа иһитиннэрбит. Кини бэлиэтииринэн, пааркаҕа өссө бизоннары кытары овцебыктар баар буолаллара ордук, онуоха судаарыстабаттан өйөбүл баара ирдэнэр.
Санатар эбит буоллахха, Арассыыйаҕа, аан дойду үрдүнэн ураты, соҕотох биһиэхэ эрэ баар Плейстоценовай паарка Саха сиригэр 1996 сыллаахха Аллараа Халыма улууһугар, Черскэй бөһүөлэгиттэн 30 км тэйиччи сиргэ төрүттэммитэ. Паарка сиригэр-уотугар хотугу кыыл табаны, тайаҕы, бизоннары, зубрдары, овцебыкатары, яктары, калмык ынахтарын уонна хойдоро туталлар.
