Киир

Киир

2016-2020 сылларга ууга барар кутталлаах нэһилиэктэр испииһэктэрэ оҥоһуллубута. Онно 123 нэһилиэнньэлээх пуун киирбит. Оттон быйыл саас Саха сирин 14 өрүһэ халаанныыр кутталлаах. Оччоҕо 98 нэһилиэк ууга барар чинчилээх. Икки өрүскэ ГТС (гидро-тэхиньиичэскэй тутуу) быһыттарын уу тоҕо көтөн тахсыан сөп. Бу туһунан ЫБММ Саха сринээҕи салаатын начаалынньыга Павел Гарин иһитиннэрбит.

Ол курдук, Ленскэйгэ, Өлүөхүмэҕэ уонна Ытык Күөлгэ быһыттар алдьанар кутталлаахтар. Билигин муус харар түгэнигэр Ленскэй улууһугар Өлүөнэ өрүс, Томпо улууһугар Алдан өрүс, Амма улууһугар Амма өрүс, Үөһээ Халыма уонна Орто Халыма улуустарыгар Халыма өрүс киэлилэриттэн тахсар кутталлаахтар. 

Муус устарга уонна ыам ыйыгар салгын температурата нуорма иһинэн буолара сылыктанар. Онон өрөспүүбүүлүкэ өрүстэрэ болдьохторун иннинэ усталлара саарбах. Муус устар 16 күнүгэр Саха сиринээҕи гидрометеорология салалтата анал бүллүтүөнү таһаарыаҕа. Оччоҕо чопчу дааннайдар баар буолуохтара. Билигин хаар уонна муус халыҥын учуоттаан эттэххэ, быйыл саас өрөспүүбүлүкэҕэ ыксаллаах быһыы-майгы балаһыанньата үөскүүр куттала олус үрдүк.

Күргэлэри, быһыттары уонна нэһилиэнньэлээх пууннары халаан уутуттан көмүскүүргэ өрөспүүбүлүкэ өрүстэригэр мууһу хараардыы уонна эрбээһин үлэлэрэ былаан быһыытынан ыытыллыахтара. Уопсайа 72 учаастакка 699 галаах мууһу хараардыахтара уонна 7 учаастакка 41 км усталаах мууһу эрбэтиэхтэрэ. Маннык үлэлэр 14 улууска барыахтара.

 

Тарҕат:

Санааҕын суруй