Киир

Киир

Тыа сирин олохтоохторо уокка оттоору, бытархай тутуулары ыытаары уонна күрүө-хаһаа туттаары лесхозтартан харчы төлөөн көҥүл ылаллар. Кыра дохуоттаах дьон сэмэй бүддьүөттэригэр ити балачча охсуулаах буолар. Лесхозтарга харчы төлөөбөккө т/х-тыгар туттуллар маһы кэрдиигэ уонна туһаныыга сүбэ бэрээдэгинэн эттэххэ:

Бастатан туран, 2019 сыл саҕаланыытыгар Арассыыйа барытын үрдүнэн «валежник» туһунан сокуон олоххо киирбитэ. «Валежник» диэн өйдөбүлгэ эмэҕирэн уонна күүстээх тыалтан сууллубут ойуур мастара уонна кини лабаалара, түөрүллэн тахсыбыт силистэрэ киирэллэр. Сокуон этэринэн, сууллубут мастары уонна мас тобохторун лесхозка харчы төлөөбөккө эрэ туһаныахха сөп.

Иккиһинэн, Киин уонна Бүлүү бөлөх улуустарыгар киэҥ иэннээх бааһыналар уонна ыраах сытар ходуһалар өр кэм устата туттуллубакка, маһынан уонна талаҕынан бүрүлүннүлэр. Сорох бааһыналар-ходуһалар туһаныллыбатахтара үйэ аҥаарыгар чугаһаата. Арассыыйа Федерациятын сиргэ сыһыаннаах сокуоннарынан, т/х-тын сирдэригэр үүммүт маһы кэртэххинэ ханнык да административнай миэрэҕэ тардыллыбаккын. Ол иһин, итинник сирдэргэ күрүө сиэрдийэтигэр, сүлдьүгэскэ уо.д.а. сыалга-сорукка анаан көҥүлэ уонна төлөбүрэ суох маһы кэрдэриҥ бобуллубат. Саамай сүрүнэ, т/х-тын сирдэригэр анаммыт миэрэлэри кэһии эрэ таһаарыллыа суохтаах.

Үсүһүнэн, Саха Сиригэр, ордук хотугу улуустарга, т/х-тын сирдэрин састаабыгар 2,34 мөл. гаа иэннээх ойуурунан уонна талаҕынан саба үүммүт сир киирсэр. Бу киэҥ иэннээх сиргэ Ойуур кодексатын ирдэбиллэрэ дьайбаттар.

Эбэн эттэххэ, т/х-тын сириттэн үүнэн турар маһы, талаҕы уонна сэппэрээги көҕөрдүүгэ анаан түөрэн ылар бобуулаах. Үүнэн турар маһы ыларга силиһи кытта сир үрүт араҥата эмиэ хастанан ылыллар. Сокуон этэринэн, т/х-тын сириттэн быйаҥнаах үрүт араҥа ылыллыа суохтаах. Ити ирдэбили хас биирдии физическэй уонна юридическай сирэйдэр булгуччу тутуһуохтаахтар.

Максим Афанасьев, “Россельхознадзор” управлениетын сири кэтээн көрөр отделын начаалынньыгын солбуйааччы.

Тарҕат:

Санааҕын суруй

Бүтэһик сонуннар