Өрөспүүбүлүкэҕэ 2004 сылтан, хас сыл ахсын ыам ыйын 18 күнүгэр Ньургуһун күнэ бэлиэтэнэр, диэн иһитиннэрэр Саха сиринээҕи Айылҕа харыстабылын министиэристибэтэ.
«Ньургуһун сибэкки саха норуотун култууратыгар кэрэ көстүү, эдэр саас, тулхадыйбат олоххо тардыһыы күүһүн – чаҕылхай символа буолар. Саха ньургуһунугар элбэх хоһоон, ырыа анаммыта. Төрөппүттэр кыргыттарын бу сааскы кэрэ, нарын сибэкки аатынан ааттыыллар – Ньургуһун уонна Ньургуйаана диэн этиллэр иһитиннэриигэ.
Биэдэмистибэҕэ бэлиэтээбиттэринэн, бүгүҥҥү күн туругунан ньургуһун көрүҥнэрин улахан аҥаардара сүтэн эрэр көрүҥ быһыытынан Кыһыл Кинигэҕэ киирбиттэрэ, ол иһин хомуйар көҥүлэммэт. Саха сиригэр биэс көрүҥ ньургуһун үүнэр.
