Ыам ыйын 24 күнүгэр Саха сирин бырабыыталыстыбата «АЛРОСА-Rangifer-Чекановскай» диэн өрөспүүбүлүкэ таһымнаах ураты харыстанар айылҕа территорията тэриллэрин туһунан уураахха илии баттаата.
Чопчулаан эттэххэ, бу этиллэр уураах 162 №-нэн таҕыста. АЛРОСА хампаанньа ураты харыстанар сирдэри тэрийиигэ уонна Өлүөнэ-Өлөөн кыыл таба популяциятын симэлиппэккэ, үйэтитэн илдьэ сылдьыыга сүҥкэн кылааттааҕын учуоттаан, бу саҥа резерваты «АЛРОСА-Rangifer-Чекановскай» диэн сүрэхтииргэ быһаарбыттар.
Кырдьыга да, бу Булуҥ улууһун аатырбыт Чекановскай томтор сирэ айылҕа анаан-минээн оҥорбутун курдук, ураты кэрэ, эриэккэс сир, айылгытынан, биология өттүнэн да сыаналаах сир. Бу сиргэ кыыл таба, чуолаан Өлүөнэ-Өлөөн популяциятын кыыл, ийэ табата сөбүлээн олохсуйар. Бу көрүҥ кыыл таба 90-ча бырыһыана манна төрүүр-ууһуур, эбиллэр.
«2016 сылтан саҕалаан, хампаанньа Арассыыйа Билимҥэ академиятын Саха сиринээҕи салаатын Криолитозона биологическай кыһалҕаларга институтун кытта кыттыһан, хас сыл аайы Өлүөнэ-Өлөөн популяциятын кыыл табалара айанныыр суолларын (миграциятын) спутнигынан салайыллар моойторук көмөтүнэн кэтээн көрүүнү ыытар. 2019 сыл олунньутугар биһиги Саха сиринээҕи Биология баайыгар уонна ураты харыстанар айылҕа территорияларыгар дириэксийэни кытта уһун кэмнээх сөбүлэҥҥэ илии баттаспыппыт. Ол сөбүлэҥҥэ олоҕуран, Саха сирин хоту өттүгэр туундара кыыл табатын популяциятын, ол иһигэр Красноярскай кыраайтан Саха сиригэр кэлэр Таймыыр популяциятын кытта, билиҥҥи туругун үөрэтэн, сыанабыл оҥоробут. Билиҥҥиттэн саҕалаан АЛРОСА Булуҥ оройуонугар баар Чекановскайдааҕы томтор сир ООПТ-тын тэрийии тэрээһиннэрин толору үбүлүүр буолар», – диэн, биһиэхэ АЛРОСА Экологияҕа киинин салайааччыта Полина Анисимова быһаарар.
Бу маннык ураты харыстанар сир – резерват – олохтонуута Өлүөнэ-Өлөөн популяциятын кыыл табалары төрүүр-ууһуур, тугуттара мэччийэр сирдэрэ көмүскэллээх уонна харыстанар кыахтанарын хааччыйар. Бу алмаас хампаанньата үбүлээн, харыстанар сиргэ кубулуйбут «АЛРОСА-Rangifer Чекановскай» резерват уопсайа 64 152 гаалаах сиргэ тайыыр эбит.
АЛРОСА
