Авиалесоохрана суһал дааннайдарынан, өрөспүүбүлүкэ сиригэр-уотугар 28 айылҕа баһаара күдэпчилэнэ турар, суукка иһигэр биэс баһаар умуруорулунна, диэн иһитиннэрэр Арассыыйа Федерациятын ЫБММ Саха Сиринээҕи салаатын пресс-сулууспата.
Биэдэмистибэҕэ бэлиэтииллэринэн, баһаар болуоссата 941,3 га иэнинэн кыччаабыт. Уоту умулларыыга 1153 киһи уонна 182 тиэхиникэ тардыллыбыт.
Саха сирин Айылҕа Харыстабылын министиэристибэтэ иһитиннэрэринэн, өрөспүүбүлүкэтээҕи ойуур пуондатын сиригэр-уотугар 17 тыа баһаарын умуруорарга үлэлэр бара тураллар. Уот ылбыт уопсай иэнэ – 6025,7 га, 12 оройуон сиригэр-уотугар.
Ааспыт сууккаҕа, министиэристибэ пресс-сулууспата бэлиэтииринэн, биэс ойуур баһаарын умуруордулар, 320,5 га уопсай иэннээх. Өрөспүүбүлүкэ үрдүнэн, баһаардары умулларарга 1121 киһи, итиэннэ 147 тиэхиникэ тардыллыбыт.
«Баһаары умулларарга кураан күн-дьыл уонна күүстээх тыал мэһэйдииллэр. Ол эрээри быһаччы уот таһыгар үлэлии сылдьар дьон, кинилэр өттүлэриттэн кыаллары барытын оҥоро сылдьаллар салгыы уот тарҕамматын курдук», - диэн иһитиннэрдэ Айылҕа Харыстабылын министиэристибэтигэр тыалары кэтээн көрөр уонна харыстыыр департамент салайааччыта Владимир Иванов.
14 оройуоҥҥа баһаары утарар эрэсиим, оттон 4 оройуоҥҥа ыксаллаах быһыы-майгы эрэсиимэ биллэрилиннэ.
Арассыыйа Федерациятын ЫБММ Саха Сиринээҕи салаата биллэрэринэн, күүстээ хонтуруолга тураллар: Хаандыга, Маар уонна Араҥастаах диэн ааттардаах нэһилиэнньэлээх пууннар тастарыгар умайар айылҕа баһаардара. Суукка иһигэр, Хабаровскайдааҕы Арассыыйа ЫБММ АСЦ анал ууну таһар туттарыылаах МИ-8 бөртөлүөттэн 11 төгүл 33 туонна ууну уот үрдүгэр куттулар.
«Уустук балаһыанньа бүлүү бөлөх улуустарыгар өссө даҕаны баар, манна алта бөдөҥ ойуур баһаара бигэргэтилиннэ, бастакы элиэтэммит күннэриттэн 5117 гектар сир уокка былдьанна. Ону таһынан икки баһаар Ньурба улууһугар, нэһилиэнньэлээх пууннартан 5 килэмэтир тэйиччи», - диэн эттэ р иһитиннэриигэ саллата сүрүн салайааччыта Павел Гарин.
