Киир

Киир

Ньурба уонна Үөһээ Бүлүү улуустарыгар үлэтин чэрчитинэн айаҥҥа, Саха Сирин аҕа баһылыга Айсен Николаев Маар нэһилиэгин таһыгар турбут ойуур баһаарыгар сырытта, диэн иһитиннэрэр өрөспүүбүлүкэ аҕа баһылыгын уонна бырабыытылыстыбатын пресс-сулууспата.

Иһитиннэриигэ бэлиэтэнэринэн, Ньурба улууһугар бүгүҥҥү күннээххэ 18 №-дээх баһаар умулла илик, Маар нэһилиэгиттэн 4,1 км тэйиччи ойуур өссө да умайа турар. Ньурбачаан уонна Күндээдэ нэһилиэктэрин таһынааҕы ойуур баһаардара умуруорулуннулар.

Уоту умулларыыга бүттүүн 186 киһи кытынна уонна 20 тиэхиникэ, ол иһигэр Владивостоктан 120 үлэһит уонна 35 олохтоох дьон. Бу баһаардары умулларыы салайааччыта Иннокентий Кычкин этэринэн, нэһилиэк таһынан 71 км минералламмыт сурааһын оҥоһулунна, уокка утары уот ыытылынна. Уот сиэбит сирэ барыта - 7250 гектар. Уот үөһээнэн баран эрэр кутталыттан сибээстээн, БЕ-200 сөмөлүөт тардыллыбыта, көтөр аал 29 төгүл төхтүрүйэн 215 туонна ууну уоту үрдүгэр кутта.

главы нюр

Маар нэһилиэгин баһылыга Иннокентий Саморцев уонна Үөдэй нэһилиэгин баһылыга Мария Николаева, итиэннэ Хаҥалас нэһилиэгин баһылыга Серафим Винокуров, Ил Дархаҥҥа нэһилиэктэр ходуһалара ордук чуолаан уоттан эмсэҕэлээбиттэрин туһунан кэпсээтилэр.

«Кэпсэтии кэмигэр Айсен Николаев нэһилиэктэр баһылыктарыгар уоттан тахсыбыт хорумньуну ааҕарга ыйда унна өрөспүүбүлүкэтээҕи бырабыытылыстыба бэрэссэдээтэлин бастакы солбуйааччытыгар Дмитрий Садовниковка эмсэҕэлээбит нэһилиэктэргэ көмө оҥорорго соруйда», - диэн этиллэр иһиттиннэриигэ.

Саха Сирин аҕа баһылыга баһаары умулларыыга кытта сылдьар туох баар дьоҥҥо махталын биллэрдэ.

«Уопсай сыранан үлэлээн саамай ыарахан кэрдиис кэми туораатыбыт, ол эрээри холкутуйар сатаммат. Билигин уокка утары уот ыытыы үлэтэ бара турар, ойуур баһаара салгыы тарҕамматын туһуттан. Уоту тохтотуу кэлэр икки-үс хонук иһигэр былааннанар», - диэн этиллэр Айсен Николаев иһитиннэриитигэр.

Ону таһынан өрөспүүбүлүкэ аҕа баһылыга Үөһээ Бүлүү улууһугар, Булгунньахтаах нэһилиэгин таһыгар турбут 11 №-дээх баһаары үөһэттэн көтүү оҥордо.

Бу ойуур баһаарын уопсай болуоссата 1300 гектар. Бу баһаары умулларыыга Хабаровскай кыраайтан 53 баһаарынньык-десантник, олохтоох авиабазаттан 18 киһи, итиэннэ «Якутлесресурс» тэрилтэттэн 21 үлэһит кыттар.

Эрдэ бу нэһилиэк таһыгар уот тарҕыныыта тохтотуллубута диэн бэлиэтэммитэ. Ол эрээри бэҕэһээ уот туруута күүһүрдэ. Бүгүн бу ойуурга уоту умулларыыга БЕ-200 сөмөлүөт үлэлиир.

Тарҕат:

Санааҕын суруй

Бүтэһик сонуннар