Өрөспүүбүлүкэтээҕи ГИБДД пресс-сулууспата иһитиннэрэринэн, ойуур баһаарыттан сылтаан, «Бүлүү» федеральнай айан суолугар быстах кэмҥэ массыына сырыыта тохтотулунна.
От ыйын 8 күнүгэр 23ч. 45м., 35 килэмиэтиртэн 182 килэмиэтиргэ диэри массыына туох баар бары көрүҥүн сырыыта тохтоото.
Иһитиннэриигэ этиллэринэн: «Дьокуускай куорат өртүттэн уонна Маҕарас өртүттэн, Госавтоинспекция үлэһиттэрэ дьуһуурустубалыы тураллар. Бу хайысханан айанныырга туттунарга сүбэлииллэр.
«Бүлүү» суоллары салайар тэрилтэ пресс-сулууспатыттан эбэн эптилэр, өскөтүн суолга кутталлаах балаһыаннньа үөскээри гыммытын көрдөххүтүнэ диспетчерскай сулууспаҕа эрийэн биллэрэргитигэр: 8 (4112) 44 10 78, 89245938028.
Саха сиринээҕи Айылҕа Харыстабылын министиэристибэтэ биллэрэринэн, Горнай улууһун Маҕарас нэһилиэгин таһыгар 5№-дээх уонна 21№-дээх ойуур баһаардарын умуруора сылдьаллар. Тыал күүһүрэн, 5№-дээх баһаар айан суолун кыйа тарҕанна.
Уоту кытары охсуһууга Айылҕа Харыстабылын министиэристибэтиттэн 64 ойуур баһаарынньыктара уонна суһаллык хомуллубут 80 олохтоох дьон бөлөҕө кытта сылдьаллар. Барыты 19 анал тиэхиникэ туһанылла сылдьар.
Саҥардыллыбыт иһитиннэрии: өрөспүүбүлүкэтээҕи суһал ыстаап биллэрэринэн от ыйын 9 күнүгэр, сарсыарда 9 чаастааҕы туругунан Бүлүү суолун 129-132 км турбут уот тохтотунна. Бэрдьигэстээх уонна Маҕарас сэлиэнньэлэриттэн эбии көмөҕө 5 уу кутар массыыналар тардылыннылар. Намтан, Бокуруоскайтан уонна Бэрдьигэстээхтэн үс баһаарынай массыына кэллилэр. Нэһилиэнньэлээх пууннарга куттал суоһаабат.
Таһаҕас тиэйэр уонна чэпчэки уйуктаах массыыналарга сырыы көҥүлэннэ. Арай умайар оттугу тиэйэр улахан массыыналарга айан өссө да бобуулаах.
