Роспотребнадзор салалтатын пресс-сулууспата иһитиннэрэринэн, Саха сиригэр 303 клещ ыстааһынын түбэлтэтэ бэлиэтэннэ, бу көрдөрүү былырыыҥҥы ахсааны, 50 түбэлтэнэн куоһарар.
Өрөспүүбүлүкэ киинигэр аҕыс түбэлтэ бэлиэтэннэ, оройуоннар ортолоругар саамай элбэх түбэлтэ Ленскэй оройуонугар сурулунна. Онно 109 киһи клещка ыстатан эмчиттэргэ көмө көрдүү кэлэ сырытта.
Клещ киһиэхэ саба түһүүтүн итиэннэ атын оройуоннарга кытта бэлиэтииллэр. Алдаҥҥа – 65. Нерюнгрига – 51. Өлүөхүмэҕэ – 38, Хаҥаласка – 9, Сунтаарга – 8, Бүлүүгэ -4, Үөһээ Бүлүүгэ – 2, Аммаҕа, Кэбээйигэ, Мэҥэ-Хаҥаласка, Намҥа, Тааттаҕа, Чурапчы улуустарыгар – биирдии түбэлтэлэр.
Клещ вируснай энцифалитынан, клещ боррелизотынан уонна да атын бу үөннэринэн тарҕанар инфекцияларынан ыалдыы ханна да буолбата. Бары буолбут түбэлтэлэргэ эрдэттэн быыһыыр-сэрэтэр үлэлэр ыытылыннылар. Клещ энцифалитын утары быһыыны 2165 киһи ылла.
Өскөтүн эһигини клещ ыстаатаҕына, олорор сиргитинэн травмпууҥҥа эбэтэр поликлиникаҕа тиийэн мэдиссиинэ көмөтүн ылыҥ, диэн Роспотребнадзор сүбэлиир.
Клещкэ ытыттарбыт киһи эрдэ быһыы ылбатах буоллаҕына, клещ вируснай энцифалитынан ыалдьыбат туһуттан, мэдиссиинэ тэрилтэлэригэр клещ ыстаабыта түөрт суукка ааһа илигинэ тиийэн, ыарыыны утары иммуноглобин ылыахтаах.
Клещ оҕо доруобуйатыгар суоһаабатын туһуттан, оҕо күргүөмнээн сынньанар уонна лааҕырдарын түөлбэлэригэр профилактическай акарициднай ыраастааһын үлэлэрэ ыытыллара былааннанар.
