Киир

Киир

Мииринэй улууһун, Сүлдьүкээр нэһилиэгин сиригэр- уотугар ойуур дохсун баһаарын содулун саныахха олус ыарахан.

Хас эмэ сүүһүнэн гектар тыа күл-көмөр буолла, от үрэхтэр, чугастааҕы мэччирэҥнэр хара хоруонан көрдүлэр.

Сүлдьүкээр 70-ча эр дьоно, ФБУ Авиалесоохрана(Бүрээтийэ), Дьокуускайтан аэромобильнай бөлөх, ЫБМК байыастара хорсуннук туруулаһа сатаатылар. Кыахтара баарынан. Ол эрэн кытыастар уот күүһүн балысхана сөхтөрдө. Алыылары, куура хаппыт сиикээннэри, үрүйэлэри-харыйалары чачыгыраччы сиэн оттонор ходуһаларга тиийдэ.

Күлүмэх уот отчуттар былаанарын төрдүттэн эстэ. Киэҥ Үрэх, Ходуһа Үрэх, Сээн Үрэх хараара баланыйбыттара, көрүөххэ ынырык дииллэр. Сатаатар, сайылык дьиэлэрэ, булчуттар үүтээннэрэ эмиэ умайан хаалыталаатылар.

Аан Айылҕа ытыыр, соҥуорар. Кыыл-сүөл күрэннэ. Күүдээхтэн мас көтөрүгэр тиийэ кытарарга сүттүлэр.

300 киһи олорор сэлиэнньэтин сүрүн дьарыга - булт, тыа хаһаайыстыбата. Булт уурайда. Тыа хаһаайыстыбатыгар сүрдээх тыҥааһыннаах балаһыанньа үөскээтэ.

Мин, Сүлдьүкээрдээҕи отделение, «Якутский скот» судаарыстыба-хааһына тэрилтэтэ буолбутун туһунан суруйан турабын. Манна 150 саха боруодатын ынахтара кыстаатылар. Олор мэччирэҥнэрин уот ньимси сотто. Эбиитин, бу генофонднай диэн дьаралыктаах сүөһүгэ кыстыыр отун булар күчүмэҕэйдэннэ.

Бу диэки үрэх сир буолан, дулҕалара, талахтара, кур лаҥхалара уот турарыгар кутталлаах. Онтуларыгар баһаар уота киирэн күүдэпчилэннэ. Лаҥхаттан сириэдийэн үөс, налыы отун кимириччи сиэтэ. Үрэхтэртэн атын Сүлдүкээр салаа да оту булар сирэ суох.

Манна дойду сир курдук нэлэмэн сыһыылар, алаастар төрүт суохтар. Онон, Сүлдьүкээрдэр от атыылаһарга күһэллэргэ тиийдилэр.

Манна Өрөспүүбүлүкэ сорунуулаах өйөбүлэ суох хаһаайыстыбаны туруктаах оҥорор дэбигис кыаллыбат буолла.

 

Станислав Алексеев

 

Мииринэй куората.

 

“Загону.ру. 2010” саайтан хаартыска.

 

 

 

 

Тарҕат:

Сэҥээриилэр

Балыакка
+1 Балыакка 21.07.2021 16:43
Мирнэйтэн доброволецтар кытынныннар.
Ответить
Балыакка
0 Балыакка 21.07.2021 19:06
Дьокуускайтан Магарассыга саха ыччата уоту утары киирсэр. Мирный -тишина.
Ответить

Санааҕын суруй

Бүтэһик сонуннар