Киир

Киир

Ойуур баһаара Уус-Алдан улууһун Кылаайы нэһилиэгэр ыкса кэллэ. «Бары олохтоохтор ыксал тирээтэҕинэ чугастыы нэһилиэктэргэ көһөр туһунан сэрэтилиннилэр», - диэн иһитиннэрдэ бөлүүн, Кылаайы нэһилиэгин баһылыга Станислав Винокуров.

Винокуров эбэн эттэ: «Күүстээх тыал түһэн ойуур баһаарын уота түргэнник нэһилиэккэ чугаһаата. Бу үөһэнэн барбыт уот. Биһиги утары уот ыыта сатаатыбыт да, тыал утары, ол иһин кыайбатыбыт. Баһаары утары нэһилиэнньэ барыта турунна. Ыксаллаах балаһыанньа тирээтэҕинэ, көһөр туһунан бары сэрэтилиннилэр. Билиҥҥи туругунан сэлиэнньэҕэ 400-500 кэриҥэ киһи олорор».

Кини бэлиэтииринэн, билигин уоту утары 30 баһаарынай үлэллир, бу 10 Ыксалаах Быһыы Майгы үлэһитэ уонна 20 АвиаЛесоохрана үлэһиттэрэ.

Нэһилиэк баһылыга, өрөспүүбүлүкэ салалтатыттан көмө көрдөһөр: «Биһиэхэ авиация көмөтө олус наада. Үрдүнэн үргүлдьү барар баһаары кытары, аҕыйах нэһилиэнньэлээх пуун дьоно охсуһара олус ыарахан. Тиэхиникэттэн биир тыраахтар эрэ баар. Бүгүн хара бэйэбит эрэ күүспүтүнэн кырдьаҕастыын-эдэрдиин халыҥ халҕаһа уоту утары турдубут».

Суруналыыстар Уус-Алдан улууһун аҕа баһылыга Алексей Федотовы кытары сибээскэ таҕыстылар. Улуус баһылыга номнуо Кылаайыга сылдьар, онтон тиэрдэр: «Бүгүн Кылаайыга бөртөлүөт икки эриэйсэнэн отучча баһаарынайдары аҕалла. Нэһилиэк сайынын үчүгэй суола-ииһэ суоҕа, анал тиэхиникэ суһаллык кэлэрин атахтыыр. Сарсыарда өссө син ама этэ, баһаар ыраах курдуга... Дьон-сэргэ оттуу, сир астыы барбыта. Онтон күнүс күүстээх тыал түһэн уот мас үрдүнэн үргүлдьү баран, 20 килэмиэтир нэһилиэккэ чугаһаата. Эмискэччи кутталлаах быһыы-майгы үөскээн барыларын үмүрү тартыбыт, төттөрү ыҥырдыбыт».

Федотов эбии этэринэн, бу эргин ардах түспэтэҕэ быданнаабыт. Букатын икки ый буолбут. Онон тыа саһаҕа курдук өрө күдэпчилэнэ түспүт. Оройуоҥҥа буола турар баһаарга – бэһис, үрдүк кутталлаах таһым иҥэриллибит.

«Мин өрөспүүбүлүкэтээҕи суһал ыстаабы кытары сибээстэстим, вице-премьер Дмитрий Садовниковтыын кэпсэттим. Кини өссө эбии биир эриэйсэнэн баһаарынайдар хамаандаларын ыытыах буолла. Сөмөлүөт туһунан туох да дии иликтэр. Ыытыахтара диэн эрэх-турах сананабыт», - диэн бэлиэтээн эттэ Уус-Алдан улууһун аҕа баһылыга Алексей Федотов.

Федотов тиэрдэринэн, уоту утары охсуһууга олохтоохтор эрэ буолбакка, чугастыы нэһилиэк дьоно-сэргэтэ көмөҕө кэлэн бары бииргэ биир сомоҕо буолан туруммуттар.

Ону таһынан, Уус-Алдан улууһун дьаһалтатын Инстаграмм ситимигэр сурулларынан, Кылаайыны кытары ыксары сытар Бээрийэ уонна Тиит-Арыы нэһилиэктэрэ биир дойдулаахтарын иэдээн аҥныыр түгэнигэр бэйэлэригэр ыларга бэлэмнэрин туһунан биллэрдилэр.

Кылаайы нэһилиэгэ Уус-Алдан улууһун биир түгэх, уустук суоллаах-иистээх нэһилиэгэ, Бороҕонтон 135 килэмиэтир ыраах сытар.

 

Тарҕат:

Санааҕын суруй