Балаҕан ыйын 2 күнүттэн күн-дьыл туруга мөлтөөн, тымныйан барыан туһунан халлаан туругун кэтиир “Фобос” тэрилтэ үлэһитэ Евгений Тишковец иһитиннэрэр.
Ити күнтэн саҕалаан Арассыыйа бары эрэгийиэннэригэр Арктика тымныы салгына өтөн киириэхтээх, хотуттан тымныы тыал үрүөхтээх, ардыахтаах, түүнүн ураты тымныы буолуохтаах. Холобур, биһигиттэн сымнаҕас килиимэттээх арҕааҥҥы эрэгийиэннэргэ күнүһүн +7-12, түүнүн +3-5 эрэ кыраадыс буолара күүтүллэр.
Вологодскайга, Мурманскайга, Архангельскайга, Карелияҕа, Комига, Урал хотугу өттүгэр уо.д.а. сирдэргэ инчэҕэй хаар түһүөхтээх. Арассыыйа хотугулуу-илиҥҥи өттүгэр сөкүүндэҕэ 17-22 миэтэрэ түргэннээх күүстээх тыаллар үрүөхтээхтэр. Даҕатан эттэххэ, атырдьах ыйын 29 күнүгэр биһиги Усуйаанабытыгар номнуо хаардаабыта.
