Бүгүн, ол эбэтэр сэтинньи 22 күнүгэр, өрөспүүбүлүкэбит киин куоратыгар салгын -40 диэри тымныйда.
Маннык температура сарсыарда алта чааска аэропорт оройуонугар бигэргэтиллибитэ, бу туһунан Дьокуускайдааҕы УГМС иһитиннэрэр. Оттон Гимеин оройуонугар -38 кыраадыс буолбут этэ.
Сарсыарда тоҕус чааска аэропорт оройуонугар өссө даҕаны -40 кыраадыс этэ, оттон Гимеиҥҥэ -37.
Дьокуускайдааҕы УГМС иһитиннэрэринэн, Кэбээйи улууһун Батамай нэһилиэгэр -45 кыраадыс тымныы турбут.
Санатар буоллахха, Саха сиригэр тыала суох күн 1-4 кылаас оҕолоро -45 кыраадыска дьиэлэриттэн тахсыбаттар, оттон 5-8 кылаас үөрэнээччилэрэ -48 тымныыга үөрэммэттэр, -50 кыраадыстан аллара тымныыга бары үөрэнээччилэр оскуолаҕа барбаттар.
Ааспыт сылтан өрөспүүбүлүкэбит киин куоратыгар оҕо үөрэммэт кыраадыһын быһаарарга тыал күүһүн эмиэ учуоттуур буолбуттара. Дьокуускайга оскуола оҕолорун үөрэммэт күннэрэ ахсынньы ыйтан саҕаланар.
