Киир

Киир

«Тигрус» айылҕа харыстабылын аһымал пуондатын дириэктэрэ Виктор Никифоров оптуорунньук күн ТАСС агенствоҕа иһитиннэрбитинэн: «Бүтэһик үйэ аҥаарыгар, Саха сиригэр баабыр кыыл суола көһүннэ, бу аарыма сиэмэх кыыл ахсаана элбээбитин туоһулуур”.


“Авиалесохрана кэтээн көрөөччүлэрэ баабыр Саха сиригэр XXI үйэҕэ бастакы киириитин бэлиэтээтилэр. Суостаах адьырҕа суола Алдан өрүс уҥа салаатыгар, кытылга көһүннэ. Бу Саха сирин соҕуруулуу-илин өттө. Эриэккэс кыыл биһиги сирбитигэр-уоппутугар киириитэ – сэдэх түбэлтэ. Былыр, арай Уус-Майда улууһугар киирэн бултаммыта, чуучулата билигин Ярославскай аатынан кыраайы үөрэтэр түмэлгэ турар”, - диэн Виктор Никифоров бэлиэтээтэ.
Кини этэринэн, баабыр Саха сиригэр киириитэ, ыкса ыалларбыт Хабаровскай кыраайдар “Северный тигр” диэн ситиһиилээх бырайыактарын кытта ситимнээх. Ол үлэ түмүгэ бу буолар. Бырайыакка «Тигрус» пуонда мэлдьитин үгүс үп-харчы көрөр.
Никифоров чопчулуурунан: «Баабырдар ахсааннара Уһук Илиҥҥэ 600-тэн таҕыста. Кинилэр Саха сиригэр силис-мутук тардаллара уустук. Тоҕо диэтэххэ манна кини төрүт аһа кабаан кыыл суох. Тыабыт убаҕас. Ол эрээри, баабырдар бэйэлэрин ыырдарын кэҥэтэн салгыы тэнийэллэрэ – үөрүүлээх сонун. Өскөтүн, бу айылҕа маанылаан айбыт сиэмэхтэрэ эстэр суолга туруммуттара буоллар, кинилэр маннык сылдьыа суоҕа этилэр».

Арассыыйаҕа Уһук Илин эрэгийиэнигэр амыр баабыра төрүүр-үөскүүр. Кини Кыһыл Кинигэҕэ киирбит. XIX үйэ ортотугар кэрээнэ суох бултааһын бу кэрэхсэбиллээх кыылы кыл мүччү эһэ сыспыт. Уһук Илиҥҥи федеральнай уокурук бүтэһик ааҕыытынан, эрэгийиэннэргэ уопсайа 600 кэриҥэ баабыр (аан дойдутааҕы популяция 95%) баар.

2013 сыллаахха, Арассыыйа бэрэсидьиэнэ Владимир Путин көҕүлээһининэн «Амурский тигр» киин арыйбыттара. Бу киин амыр баабырын көмүскэлинэн уонна ыырдарын кэҥэтии-тарҕатыы үлэтинэн ыкса дьарыктанар.

ТАСС

Тарҕат:

Санааҕын суруй