Киир

Киир

 

Быйыл АЛРОСА Экологияҕа киинэ “Think green” (“Думай по-зеленому”) диэн тулалыыр эйгэ харыстабылыгар анаммыт эрэгийиэннээҕи бырайыак куонкуруһун саҕалаабыта. Бу күннэргэ куонкурус куоластыыр түһүмэҕэ саҕаланна. Онон, ким баҕалаах сөбүлээбит бырайыагын өйүүрүн биллэриэн сөп. Куоластааһын ахсынньы 26 күнүгэр диэри ыытыллар. Экологияҕа анаммыт бастыҥ бырайыак олоххо киирэригэр АЛРОСА биир мөлүйүөн солкуобайга тиийэр харчыны бириэмийэлиэҕэ.

Санаттахха, “Think green” (“Думай по-зеленому”) куонкурус быйыл атырдьах ыйын бүтүүтүгэр саҕаламмыта. Кини сүрүн соруга – Саха өрөспүүбүлүкэтин олохтоохторун чөл туруктаах тулалыыр эйгэни тэрийэр туһугар, кыттыгас бырайыак уонна волонтер хамсааһыныгар кытыарыы.

Кэлбит сайаапкалар түмүктэринэн, куоластааһыҥҥа экологияҕа анаммыт барыта 19 бырайыак киирбит. Олор ортолоругар бааллар – оскуола, уһуйаан, үрдүк үөрэх кыһаларын кэлэктииптэрэ, урбаанньыттар, оскуола оҕолоро, устудьуоннар уонна экология, тулалыыр эйгэ туһугар долгуйар биирдиилээн дьон.

“Куонкуруска киирбит бырайыактар бары киһи уонна айылҕа алтыһыытын, дьүөрэлэһиитин таарыйар уопсай тиэмэлээхтэр эрээри, майгыннаспат, тус-туһунан хайысхалаахтар. Онон олортон хайаларын эрэ ордук чорботор, “бу – саамай тоҕоостоох, бастыҥ” диир олус уустук буолууһу. Онон биһиги бастыҥ бырайыагы өрөспүүбүлүкэ олохтоохторо талыахтарын баҕарабыт”, – диэн АЛРОСА Экологияҕа киинин салайааччыта Полина Анисимова кэпсиир.

Куоластааһын куонкурус интэриниэт саайтыгар (https://www.thinkgreen.alrosa.ru) ыытыллар. Бырайыактары кытта эмиэ ити саайка киирэн билсиэххэ сөп.

Ахсынньы 26 күнүгэр куонкурус түмүктэнэр. Ити күн биэс бастыҥ үлэ талыллан, салгыы киирсэр, күрэстэһэр туһугар, үһүс түһүмэххэ тахсар. Оттон муҥутуур кыайыылааҕы 2022 сыл тохсунньутугар анал хамыыһыйа быһаарар. Хамыыһыйаҕа быһаччы үлэлэһэ сылдьар АЛРОСА экологтарын сэргэ өрөспүүбүлүкэ экологияҕа уопсастыбанньыктара киириэхтэрэ. Санаттахха, АЛРОСА хампаанньа бастыҥ экология бырайыага олоххо киирэригэр биир мөлүйүөн солкуобайы биэриэҕэ.

Тарҕат:

Санааҕын суруй