Бүгүн, ахсынньы 22 күнүгэр күн уһуна 05 чаас 07 мүнүүтэ 28 сөкүүндэ. Сахаларга бу күн туох уратылааҕын, ханнык бит-билгэ баарын биһиэхэ СӨ үөрэҕириитин туйгуна, А.Д. Макарова аатынан Дьокуускайдааҕы култуура уонна ускуустуба колледжын төрүт култуураҕа уһуйааччыта Михаил Николаевич Винокуров кэпсиир:
“Ахсынньы ый сахаларга бэс ыйын кытта тэҥнэһэр. Бу ыйга хараҥата уһун, оттон бэс ыйын 22 күнүгэр үрүҥ түүннэр үүнэллэр, ол эбэтэр сырдыга уһун буолар. Онон, ахсынньы ыйга баһыйар өттө – хараҥа, бэс ыйга – сырдык. Ахсынньы 22 күнүттэн 25-р диэри биир кэм бириэмэ дииллэр, саамай кылгас күннэринэн ааҕыллаллар, ол эбэтэр хараҥа уһуна тура түһэр дииллэр. Оттон салгыы, 25-с чыыһылаттан кутуйах хаамыытынан күммүт оргууйдук уһаан киирэн барар. Субу күнтэн бэс ыйын 22-р диэри халлаан сырдыыра уһуур.
Бэс ыйын 22-25 күннэрэ муҥутуур уһун күннэринэн ааҕыллаллар. Бу сайыҥҥы ый 25 күнүттэн ахсынньы 22-р диэри күммүт кылгыыр. Оттон, бит-билгэ өттүттэн ыллахха, ахсынньыга олус тымныйдаҕына, бэс ыйа куйаас буолар диэччилэр. Бу ыйга хаардаатаҕына, бэс ыйа ардахтаах буолар эбит».
