Кытайга, Гирин провинциятын хотугулуу-арҕаа өртүгэр, Сунъюань куоракка баар Чаган күөл өрөспүүбүлүкэ улахан күөллэриттэн биирдэстэрэ буолар. Хас да үйэ тухары олохтоохтор манна эрэ баар кыһыҥҥы муус аннынан ыытыллар балыктааһын көрүҥүн харыстаан илдьэ сылдьаллар. Эрэгийиэн былаастарын өйөбүллэринэн, бу былыргы сэдэх ньыма бүгүҥҥэ диэри тиийэн кэлбит, маны таһынан, балыксыттар өссө күөл иччитигэр сүгүрүйэллэрэ соччонон кэрэхсэбиллээх. Муҥха бэрийиитэ, муус аннынан түһэрии, бу барыта Кытай аныгы уопсастыбатыгар бэрт дэҥҥэ көстөр эриэккэс көстүү.
Муус аннынан түһэр муҥха 1000 миэтэрэ кэриҥэ иэннээх, булт тэрилин уу анныгар түһэрэргэ сүүстэн тахса ойбон алларыахха наада. Уһун ураҕастарынан муҥханы уу аннынан ыыталлар, тимир күрүчүөктэринэн тардаллар. Олохтоох балыксыттар оннооҕор биирдэ 600 000-тан тахса киилэ балык туттараннар, Гиннес рекордун кинигэтигэр киирбиттэрэ.
Бу ньыма саха муҥхатыгар олус маарынныыр эбит. Манна даҕатан эттэххэ, Чаган күөл (сахалыыта - Чаҕаан) тула монгуоллар олороллор. Бу – кинилэр төрүт үгэстэрэ.Сабаҕалаан көрөн эттэххэ, маннык балыктыыр ньыманы саха соҕурууттан илдьэ кэлиэн сөп эбит. Оччотооҕу истиэп олохпут саҕаттан, түҥ былыргы үгэспит буолуон сөп.
М
М
