Бүгүн сарсыардаттан, куйаар ситиминэн, «бассаабынан» уонна «инстаграмынан», икки кыыл таба Амма сирин-уотун устун сылдьар видеолара кэлитэлээтэ.
Тарҕаммыт «сонуннарга» этиллэринэн, Амма Чакырыгар көрбүттэр. Биидьийэҕэ көстөрүнэн, массыынанан айаннаан иһэр дьон, аара икки айылҕа оҕото, кыыл табалар барахсаттар суолу туоруулларын, онтон куотан эрэрдии, киэҥ хонуу устун сүүрэллэрин суотабай төлөпүөннэригэр устубуттар.
Бу дьикти көстүү туһунан дьон санаата араас буолла. Ким эрэ: «Ойуур баһаарыттан сылтаан аһыыр сирдэрэ бараммыт быһыылаах», – диир. Сорох дьон: «Томпоттон быраканьыардартан куотан иһэр буолуохтарын сөп», - диэн этинэр. Оттон, олох даҕаны биир бөлөххө: «Табаны иитэр дьон үчүгэйдик көрбөккө, ыраатыннаран кээспиттэр», – диэтилэр...
Дьиҥинэн, араас источнигы хаһыстахха, кыыл таба барахсан былыр-былыргыттан миграциялыыр, аһылыктаах сири-уоту көрдөөн, ыраахха тиийэ барыан сөп эбит. Ол эрээри, таба үөрэ халыҥ, ахсааннарынан элбэх буолуохтаах эбит. Билигин, кинилэр иккиэ эрэ буолан сылдьаллара киһини дьиксиннэрэр...
Даҕатан этэр буоллахха, ааспыт ыйга «инстаграм» @novosty_yakutska диэн сирэйигэр Амма суолугар үс кыыл таба сылдьарын туһунан таһаарбыттар этэ...
Онон сылыктаатахха, ити табалар билигин Амма Чакырыгар кэлбиттэр. Гынан баран, тоҕо кинилэр иккиэ эрэ буолан хааллыллар? Үһүстэрэ ханна баарый?..
