Кытай халандаарынан олунньу 1 күнүттэн Баабыр сыла саҕаланна. Мантан сиэттэрэн, баабырга болҕомто улаата быһыытыйда.
Бу сиэмэх эрээри кэрэ бэйэлээх айылҕа маанылаах оҕотун үгүскүт зоопааркаҕа көрбүт буолуохтаах. Булчут өбүгэлэрбит илэ көрсүбүт буоланнар, саха тылыгар баабыр диэн аатынан киирдэҕэ. Оттон айылҕаны үөрэтэр анал идэлээх дьон бу дьикти кыыл олоҕун араас наукалыы ньыманан кэтииллэр.
“Айылҕа үөрэҕэ” телеграм-ханаал суруйарынан, аан дойдуга саамай бөдөҥ сиэмэх куоска – Амуур баабыра Приморскай уонна Хабаровскай кыраайдарга, Дьэбириэй автономиялаах уобалаһыгар 180 000 кв.м иэннээх сиргэ олорор.
Билиҥҥи туругунан, Амуур баабырын ахсаана 600 кэриҥэ. Бу кыыл ахсаанын сыл ахсын сир-сир арааран ыыталлар. Оттон бүттүүн ахсаанын 10 сылга биирдэ эрэ таһаараллар.
Бүтэһик ааҕыы 2015 сыллаахха буолбут. Ол эрээри, Уһук Илиҥҥи тайҕаҕа африканскай чума диэн ыарыы туран, баабыр аһылыктанар кабан кыыла аҕыйаан, былаантан туораан 2021-2022 сс. эбии учуот ыытар ирдэммит.
Баабыр ахсаанын ааҕыы үс түһүмэҕинэн барар: ааҕыыга бэлэмнэнии (кыһын буолуор диэри), кыһыҥҥы ааҕыы (тымныы кэмҥэ) уонна бүтэһиктээх ааҕыы (олунньу саҥатыгар). Баабыры суоллаан 600 тахса анал идэлээх исписэлиис үлэлии тахсыаҕа.
