Соторутааҕыта социальнай ситимнэринэн ньургуһуну сиир улахан хомурдуостары көрөн сөҕөн, видеоҕа устубуттара тарҕаммыта.
Ону быһаараары “РНА Сибиирдээҕи салаатын Дьокуускайдааҕы научнай киинэ” федеральнай чинчийэр киин криолитозона биологическай кыһалҕаларга институтун энтомолог-учуонайдара Саргылана Ноговицына уонна Альбина Бурнашева хомурдуостар мустубут сирдэригэр тахса сылдьыбыттар.
Кинилэр быһаарбыттарынан, Дьокуускай тулатыгар, Табаҕа тумуһугар «көннөрү майка» (Meloe proscarabaeus I.) булулунна. Көннөрү майка – бу Нарывниктар биистэрин ууһун хомурдуоһа эбит.
Саха сирин соҕуруулуу-арҕаа уонна киин оройуоннарыгар биирдиилээн көстөр. Хомурдуостар саас (ыам ыйыгар) аһаҕас миэстэлэргэ баар буолаллар, араас үүнээйи сибэккитинэн, сэбирдэҕинэн аһыыллар.
“Хомурдуос бу көрүҥэ хааныгар уонна ууһуур-тэнийэр уорганыгар кантаридин диэн харыстанар сүлүһүннээх эттиктээх. Кантаридин тириигэ уонна салыҥнаах бүрүөҕэ (слизистая оболочка) түбэстэҕинэ уокка сиэппит (ожог) курдук буолуон эбэтэр аллергияны үөскэтиэн сөп. Хомурдуостар баар сирдэригэр химиялаах убаҕастары туттумаҥ уонна хомурдуостары хомуйумаҥ диэн сүбэлиибит”, — диэн энтомолог Саргылана Ноговицына иһитиннэриитин институт пресс-сулууспата суруйар.
