Бүгүн сарсыарда 08.00 ч. туругунан, Саха сиригэр ойуур баһаара баара бэлиэтэммэтэх. Ааспыт суукка иһигэр тыа баһаарынайдарын бөлөхтөрүн күүстэрин кытта Чурапчыга буолбут, 34 га иэннээх тыа баһаарын тохтоттулар. Бу туһунан СӨ Экологияҕа министиэристибэтэ иһитиннэрэр.
Баһаарга кутталлаах сезон саҕаламмытын кэнниттэн, өрөспүүбүлүкэ тыатын пуондатыгар араас таһымнаах 15, оттон аһаҕас сиргэ 6 баһаар тахсыбыта. Ааспыт сылга баччаларга Саха сирин үрдүгэр 20603,5 га иэҥҥэ 91 тыа баһаара баара биллэр этэ.
Саха сирин Экологияҕа министиэристибэтэ өрөспүүбүлүкэ олохтоохторугар тыаҕа баһаартан сэрэхтээх буолуу ирдэбиллэрин булгуччу тутуһулларын туһунан этэр.
Өскөтүн эһиги тыа баһаара тахсыбытын туоһутунан буолбут буоллаххытына, бу туһунан суһаллык эрэгийиэннээҕи диспетчерскэй сулууспаҕа биллэриэхтээххит, нүөмэрдэрэ - 8-4112-44-74-76. Эбэтэр тыа охранатын нүөмэригэр биллэрэҕит - 8-800-100-94-00.
