Бүгүҥҥү туругунан, федеральнай Авиалесохрана парашютнай-десантнай сулууспатын 272 үлэһитэ ойуур баһаардарын умулларыыга туруулаһар. Бу туһунан федеральнай Авиалесоохрана солбуйааччыта Андрей Ерицов биллэрэр.
Этиҥтэн сылтаан үөдүйбүт, ыраах үөскээбит тыа баһаардарын умулларыыга анаан, тирэх хастарыы полосаларын оҥорор эстэрии ньыматын туһаналлар. Маннык умулларыыны Ленскэй, Өлүөхүмэ, Сунтаар, Уус Майда, Алдан уонна Нерюнгри оройуоннарыгар туһаналлар. Маны сэргэ, «Авиалесоохрана» өрөспүүбүлүкэҕэ “сымыйа” ардахтары аҕалыы үлэтин салгыы ыытар. Маныаха, йодистай үрүҥ көмүстээх ПВ-26М диэн пиро-ботуруоннары симэргэ аналлаах “Веер” диэн анал тэриллээх «Циклон» АН-26 сөмөлүөтү көтүтэллэр. Маны ытыалаатахтарына, сойбут былыт систиэмэтин үөһээ өттүгэр реагент дьайыытыттан ардахтар үөскүүллэр. Маннык «сымыйа» сөҥүүнү ыҥырыыны «кучево-дождевой», «кучевай кыамталаах» уонна «араҥалаах кучевой» былыттар баар буоллахтарына биирдэ эрэ туһаналлар.
Бэс ыйын 27 күнүгэр, ойуур баһаардарын умулларыыга «сымыйа» ардахтары ыҥырыы үлэлэрин Сунтаар, Ньурба, Ленскэй, Өлүөхүмэ, Алдан, Томпо уонна Уус Майда оройуоннарын үрдүлэринэн ыыппыттара.
Оттон бэс ыйын 28 күнүгэр маннык дьайыылары Уус Майдаҕа, Томпоҕо уонна Горнайга ыыталлар.
