Махтал күнүгэр махтал туһунан хоһооннор

 

*****

Махтанабын дьылҕабар

Күнү көрөн турарбар,

Тулам тыаһын истэрбэр,

Олох устун барарбар.

 

Махтанабын дьылҕабар

Биэрэр бары бэлэҕэр,

Таптал кэлбит кэмигэр

Ийэ буолбут үөрүүбэр.

 

Махтанабын дьылҕабар

Кэскил үүммүт күнүгэр

Үрдүк дьолу билбиппэр,

Эбээ аатын сүкпүппэр.

 

Махтанабын дьылҕабар

Тирэх буолар дьонноохпор,

Алгыыр күндү ийэбэр,

Оҕолорбор,сиэннэрбэр.

 

Махтанабын дьылҕабар

Үтүө дьоннуун билсэрбэр,

Дьүөгэлэрдиин күлсэрбэр,

Аймахтардыын көрсөрбөр.

 

Махтанабын дьылҕабар

Эрэйтэн үөрэнэрбэр,

Кыһалҕаны кыайарбар,

Кэрэҕэ талаһарбар.

 

К.Маркова

 

Махтал - сүдү күүс

 

Махтал истиҥ иэйиитэ,

Махтал сылаас эйгэтэ,

Махтал үөрүү кыната,

Махтал олох кылаата.

 

Махталынан иитиллиэх,

Махталынан этиниэх,

Махталынан олоруох,

Махталынан толоруох.

 

Махтал дьолун баҕаран,

Махтал тыынын тиэрдиэххэ,

Махтал аныыр тылынан

Махтал күүһүн билиэххэ.

 

Махталы таптыахха,

Махталы туойуохха,

Махталы таайыахха,

Махталы уунуохха.

 

Махтана кэпсиэххэ,

Махталтан үөрүөххэ,

Махтана үөрэниэх,

Махталтан дуоһуйуох.

 

Махталлаах буолуохха,

Махталы сатыахха,

Махталлыын аргыстас,

Махталлыын эҥэрдэс!

 

Розалия Павлова

Өлөөн

16.05.2019с.

 

**

Махтал тыла былыргыттан

Сылаас мичээр аргыстаах,

Үөрүү тыынын үллэстэр

Алгыс эрэ хаттыктаах.

 

Махтал тахсар ис сүрэхтэн

Үөрбүт- көппүт айылгыттан,

Үтүө санаа кынаттанан

Махтал кууһар айылҕаттан.

 

Махтал тылын харыстаамаҥ,

Үтүө тылы кэччэйимэҥ,

Сырдык санаа иэйиитин

Этиҥ махтал итиитин.

 

Махтаныҥ, махтал күнүгэр.

 

Ааптара биллибэт.

 

 

Айылҕа күүһүгэр махтаныҥ

 

Айылҕа маанылыыр,

арчылыыр

Үтүөҕэ сирдэтэр ыйаахтыыр,

Ийэ сир кэрэтин харыстыыр

Үгэһи биһиэхэ сүбэлиир.

 

Төрөөбүт буорбутун ыраастыыр,

Тулалыыр эркини бэрийэр,

Ытык иэс туолуутун ирдэһэр,

Хас биирдии киһиэхэ сүктэрэр.

 

Махтаныҥ айылҕа күүһүгэр,

Эрэли сүрэххэ киллэриҥ,

Эн киһи буоларгар көмөтүн,

Дьиҥ чахчы сүбэтин ылыныҥ!