«Имэҥ» балаһаҕа ырыаһыт, артыыс хас да дьахтар эрдэриттэн 29 сыл аҕа эбиттэрэ суруллубутун ааҕан баран, санаабын үллэстэргэ холоннум.
Дьахтар эриттэн аҕа саастааҕа, кырдьык, биһиэхэ сүөргүлэнэр курдук. Оттон эр ойоҕуттан аҕа буолара сөптөөҕүнэн ааҕыллар. Оннооҕор сүүрбэ да сыл аҕа буоллаҕына, улаханнык аахайбаттар. Бу чааһыгар тус көрүүбүн «чып кистэлэҥинэн» «быктарыым» дуу. Суруксуттууртан ыраах киһибин. Онон туох эрэ сыыһа-халты баар буоллаҕына, көннөрүөххүт диэн эрэнэбин. Баҕар, бу аһыллыым кимиэхэ эмэ туһалыа, дириҥник толкуйдаан көрөрүгэр төрүөт буолуо. Мин этэрим саамай сөптөөх диэбэппин. Дьон араас, билэбин. Ол эрээри...
Мин сүүрбэбин да туолбакка сылдьан, бэйэбиттэн уон биэс сыл курдук аҕа киһини ис сүрэхпиттэн таптаан кэргэн тахсыбытым. Тута этэбин, билигин да сылаас сыһыан, таптал тыына баар. Ол эрээри оччолорго дьонум сүбэтин ылымматахпыттан ардыгар кэмсинэн ылабын. Санаан да көрдөххө, киһи биирдэ бэриллэр олоҕор санаа иһинэн олороро ордук буолуо ээ.
Төрөппүттэрим, ордук ийэм барахсан, саастаахха кэргэн барабын диэбиппэр бастаан букатын сөбүлээбэтэхтэрэ. «Дьэ, тоҕойум, кэлин этэ-сүбэлии сатаабатахтара диэн кыҥкыйдыыр буолаайаҕын. Билигин биллибэтэҕин аанньа, сыл-хонук ааһыа. Оттон киһиҥ быдан түргэнник кырдьыа турдаҕа», – диэн көрбүттэрэ да, мин истэн бэрт. Хата, өһүргэниэх курдугум.
Кэргэним, бүтүн 35 сааһыгар диэри дьиҥ тапталлара диэни билбэккэ сылдьыбытын, миигин көрөөт таптаабытын этэрэ. Биллэн турар, оччо сааһырыар диэри мас манааҕынан сылдьыбатах. Биир дьахтардыын балачча өр сылдьыбыттар этэ да, таптал тыына да суоҕа үһү. Наһаа үчүгэйдик ухаживайдыыра. Кыра оҕо курдук атаахтатара, тугу баҕарбыппын толорон иһэр курдуга. Туохха эмэ мунаахсыйдахпына, киниэхэ бэлэм хоруй баар буолан иһэриттэн олус астынарым. Аҕам миэхэ «отчим» этэ. Онон кини ситэ биэрбэтэх тапталын, баҕар, булбут дьүһүнүм буолуо. Бэйэм саастыылаахтарым онно холоотоххо, наар чугас сыһыан (секс) эрэ иһин көрсө сатыыр курдуктара. Эрийсэ, билсэ да сатааччы син баара. Оттон мин «таптаатым да, тайахтаахха» диэн санааны тутуспутум. Ол кэмтэн бэлиэр сүүрбэттэн тахса сыл ааста. Тапталбыт ыраас мэктиэтэ буолбут икки оҕолоохпут. Туораттан көрдөххө, толору дьоллоох ыалбыт. Хааччыллыы да өттүнэн, дьон сиэринэн олоробут. Улуус киинэ диэн тохтообокко, сүөһү-ас тутабыт. Бэйэм орто үөрэҕи бүтэрэн, идэбинэн үлэлиибин.
Кэлиҥҥинэн киһим эр киһи быһыытынан лаппа мөлтөөн иһэр. Ол суоҕа буоллар, кыратык омуннуу түстэххэ, киинэ омуннаах тапталыгар олохпут дьүөрэлиэ эбитэ буолуо. Ону баара...
Киһи дьахтар быһыытынан ситэн-хотон бардаҕына, имэҥ өттүнэн ирдэбилэ күүһүрэр эбит. Салгыы өссө дириҥээн бардаҕына, хайдах буолуохпун билбэппин. Кинини таҥнарар санаам суох. Оттон эт-хаан ирдиирин, имэҥҥэ тардыһыытын билиммэт буолуу табыллыбат курдук. Эбэтэр бэйэм хайдаҕым эрэ эбитэ дуу? Кэргэммин кытта ыкса сыһыаммыт, тугу этэрим өйдөнөр ини, суох кэриэтэ буолла. Кини буоллаҕына онно эрэ аахайбат. Буолуохтааҕын курдук ылынар. Биирдэ эмэ таайтаран эттэххэ, букатын атыннык эргитэн таһаарар. «Миэхэ тапталыҥ сойдоҕо. Эбэтэр атыҥҥа саантаатыҥ дуу?!! Бэрт дьахтар эдэрдэ көрдүү бар, кытаат» диэн кыыһыран барар. Аны, абата диэн, кэлиҥҥинэн була-була күнүүлүүрэ элбиэх курдук. Сылдьан эрэ эмискэ саҥата суох буолан хаалар. Кыыһырар буолбут. Онтон саллан саҥарбаппын. Барытын испэр тутабын. Устунан муунтуйабын.
Бу маннык толору өйдөспөт буолуу күннээҕи сыһыаҥҥа, баҕар-баҕарыма, биллэр, мэһэйдиир эбит. Оҕолорум кыраларыгар имэҥ-орон дьыалатыгар улаханнык наадыйбат курдугум ээ. Дьикти. Билигин кинилэр улааттылар. Онон оҕолору атахтарыгар туруорар курдук биир ситимниир ураты күүс мөлтөөбүт кэмигэр, эбиитин эр киһи дьахтардыын сыһыана намтыыра охсуулаах буолсу. Онон кэргэнниилэр саастара улаханнык араастаһара, туох да үчүгэйэ суох диэм этэ.
Бастаан «ыалдьыттыыра» аҕыйаан хаалбытыгар, туох кистэлэй, дьахтардаммыт дуу диэн уорба санаа киирэрэ. Ити өссө уонча сыллааҕыта этэ. Тылынан баҕас, кини маастар. Хайа да дьахтары уулларар толору кыахтаах. Онтум, бу көрдөхпүнэ, туора сылдьыбат чинчилээх. Астыммаппын билэ сылдьан, бэйэтэ да «кыччаабыт кыаҕын» атыҥҥа ыытыа дуо, ама? Үлэтэ оннук айылаах таптаһарга да кыах хаалбатын курдук илистиилээх буолбатах. Ыалдьара эмиэ көстүбэт. Чэ, ити курдук элбэҕи саныыбын, сыымайдыыбын.
Хал буолбута буолуо диэн, ис таҥаспыттан саҕалаан тас таҥаспар диэри саҥардан биэрдим, эдэр кэмнээҕибинээҕэр лаппа оҥостор буоллум. Туһалаабыта көстүбэт. Хата, ньиэрбинэйдиир курдук. Ардыгар айаҕалыы сатаан «Наһаа да бэйэмсэххин, эн!! Саатар кыһаллыа да эбиккин!!» диэн малтаччы сарылыахпын баҕарабын. Кыһыыта бэрт ээ, эн долгуйа-долгуйа киэһэ буоларын кэтэһэҕин. Киниэхэ анаан оҥостоҕун. Таптал абылаҥнаах күүһүгэр бэринэр алыптаах түгэҥҥин хараххар оҥорон көрөҕүн. «Баҕар, бүгүн» диэн буолар. Хантаан!! Кини... көхсүн көрдөрөн баран, бэрт холкутук утуйан буккураан хаалар!! Төһө да ымманый, имэрий-томоруй, тоҥ бэйэтэ уһуктуо диэн саараама! Оттон бэйэтэ биирдэ эмэ баҕардаҕына, атын хартыына. Боруоба, «сылайдым, ыарыйдым» диэн көр эрэ. Ол түгэммит да, баҕалаах буолбут.
Кини өйдүүрэ буоллар дуу, кини эр киһилии эрчимнээх илиитин сылааһын, ууруур-таптыыр уохтаах чааһын олуһун суохтуурбун, имэҥнээх таптаһыыны кимнээҕэр күүтэрбин! Мин атыҥҥа саантаабаппын. Кини эрэ миэхэ наада!
Ульяна.
