Бэйэҕит да күн аайы истэ сылдьаргыт буолуо, кэнники кэмҥэ сорох дьон нууччалыы “бырастыы гын” диэни сахатытан “алы гын” диэнинэн солбуйар буоллулар. Саха тылыгар толоостук киирбит тылы сахатыта сатыыр – хайҕаллаах дьыала. Ол эрээри “алы гын” диирбит “бырастыы гыннарарга” барсар тыл дуо? Төһө сөбүй?
Быһаарыылаах тылдьыкка “алы: алы буол – кыыһырыыны, кыһыйыыны, куһаҕан санааны аһаран сымнаан, амарахсыйан кэл (холобур, көрдөһүүнү ылынан, алы гыныыттан)”, оттон “алы гын – албыннаһан, сымнаан эйэҕэһимсийэн ким эмэ санаатын түөкэйдээ, санаатын көнньүөрт” диэн быһаарыллыбыт.
Чахчыта да оннук, “алы гын”, “алы гына сатаа” диэн күн бүгүнүгэр диэри киэҥник туттулла сылдьар тыл. Үчүгэй өйдөбүлгэ туттуллубат. Үксүгэр, ити тылдьыкка быһаарыллыбытын курдук, “кимиэхэ эрэ албыннаһан санаатын көнньүөрдэ, түөкэйдии” сатыыры кытта сибээстээх. Ол эбэтэр, дьиҥ ис дууһаттан бырастыы гыннарыыны кытта туох да уопсай өйдөбүлэ суох, мөкү дьайыҥнаах тыл. Санаан да көрдөххө, ис сүрэхтэн буолбакка, албыннаһан, түөкэйдээн бырастыы гыннара сатыырга туох үчүгэйэ кэлиэй...
Ол оннугар, “бырастыы гын” диэни сахалыы бу тыл бастакы суолтатынан “алы буол” диэбит быдан сиэрдээх буолуох кэриҥнээх.
"Кыым" хаһыат кулун тутар 27 күнүнээҕи нүөмэриттэн.
