Булгуччулаах мэдиссиинэ страховката (ОМС) көмөтүнэн ийэ буолуон баҕалаахтар ЭКО диэн сыаналаах өҥөнү босхо туһаныахтарын сөп. Ол курдук, былырыын Саха сиригэр 700 дьахтар экстракорпоральнай буоһатыыны босхо ааспыттар. Мантан 400-һэ – өрөспүүбүлүкэ таһыгар. Ол туһунан ОМС Пуондатын Саха сиринээҕи управлениетын начальнига Людмила Чемякина иһитиннэрдэ.
Кини этэринэн, ЭКО дьайыытын бары түһүмэхтэрэ, донор матырыйаалын туһаныыттан ураты, ОМС тарыыбыгар киирэллэр, онон дьахталларга босхо оҥоһуллаллар. Манна эмбриону тоҥоруу эмиэ киирэр эрээри, харайан туруоруу иһин пациеннар бэйэлэрэ төлүүллэр.
Саха сиригэр ЭКО өҥөтүн Дьокуускайга Национальнай мэдиссиинэ киинигэр («РБ №1 – НЦМ») оҥороллор. Маны туһаныан баҕалаахтар олорор сирдэринэн бырааска (акушер-гинекологка) тиийэн, ирдэнэр чинчийиини ааһыах тустаахтар. Оҕо үөскээбэт төрүөтэ 6 ый иһигэр быһаарыллыахтаах. Дьахтар ЭКО оҥортороругар туох да бобуу, хааччах суох буоллаҕына, эмтиир быраас докумуоннары СӨ Доруобуйа харыстабылын хамыыһыйатыгар ыытыахтаах. Билигин ЭКО-ҕа сурутуу от ыйыгар уонна атырдьах ыйыгар бара турар.
«Ити курдук ааспыт сылга Саха сирин олохтоохторугар ОМС полиһынан - 712, ол иһигэр өрөспүүбүлүкэ тас өттүгэр - 395 ЭКО өҥөтө оҥоһулунна. Бу оҕо үөскээһинин 100% мэктиэлээбэт эрээри, Эко ааспыт дьахталлар 30-35%-ра бастакы сырыыттан хат буолаллар», – диэн Людмила Чемякина быһаарда.
ОМС полиһынан мэдиссиинэ өҥөтүн ылыы туһунан доруобуйа харыстабылын биир кэлим нүөмэринэн эрийэн ыйытыахха сөп: 8-800-100-14-03 (босхо).
Сонун төрдө: Yakutia24/Якутия24
