Бүгүн Таатта улууһун киин балыыһатыгар соҕуруу эрэгийиэнтэн аҕам саастаах гинеколог-быраас “Земскэй дуоктар” тосхолунан үлэлии кэлбитин туһунан социальнай ситимнэргэ суруйдулар. Кырдьык, тыа сиригэр да, бэл, куораттарга да, бэйэбит быраастарбыт тиийбэт буоланнар, атын эрэгийиэн исписэлиистэрэ кэлэн үлэлииллэрэ баар суол.
Бу күннэргэ РФ Доруобуйа харыстабылыгар министиэристибэтэ мэдиссиинэ үрдүк уонна орто үөрэҕин саҥа бүтэрбит ыччат дьон идэлэринэн булгуччу үс сыл үлэлиэхтээхтэрин туһунан дьаһалы таһаарарга этии киллэрбитин “Коммерсантъ” иһитиннэрэр.
Суруйалларынан, доруобуйа харыстабылын министиэристибэтин көҕүлээһинин “Үөрэхтээһин туһунан” федеральнай сокуоҥҥа уларытыы быһыытынан киллэрбит. Өскөтүн уларыйыы олоххо киирдэҕинэ, бүддьүөт суотугар үрдүк үөрэҕи бүтэрбит медиктэр үс сыл хайаан даҕаны үөрэммиттэрин боруостаан судаарыстыбаннай да, чааһынай да балыыһаларга быраастыахтаахтар, оттон колледх выпускниктара икки сыл үлэлиэхтээхтэр.
СӨ Доруобуйа харыстабылыгар министиристибэтэ СИА-ҕа кэпсээбитинэн, күн бүгүн М.К. Аммосов аат. ХИФУ Мэдиссиинэҕэ институтугар 2228 устудьуон үөрэнэ сылдьар. Ол иһигэр бүддьүөт суотугар 744 оҕо.
Санаттахха, Саха сирин балыыһалара бырааһынан 78% эрэ туолан тураллар. Мэдиссиинэ тэрилтэлэригэр барыта 5444 быраас үлэлии сылдьар. Үлэһит сүрүннээн Арктика улуустарыгар тиийбэт. Саамай аҕыйах быраас Абый, Кэбээйи, Орто Халыма уонна Уус Майда улуустарыгар үлэлиир, исписэлиис букатын тиийбэт.
“Бырааска наадыйыы (укомплектованность) 78%, орто сүөһүөх мэдиссиинэ персоналыгар – 90% туолан турар. Ол гынан баран, идэтийиинэн көрдөххө, сыыппара араастаһар. Улахан болҕомто бастакы сүһүөх мэдиссиинэ тэрилтэлэригэр ууруллар. Билигин бастакы сүһүөх мэдиссиинэ тэрилтэлэригэр бырааска наадыйыы 92% туолан турар. Быраас уонна тэрэпиэп өссө баар буоллаҕына, чопчу ыарыыны көрөр-эмтиир исписэлиис (узский специалист) – туспа боппуруос. Арктика улуустарыгар бырааска наадыйыы 40 – 50% эрэ туолан тура. Ити олус кыра көрдөрүү. Онон билигин дьон бырааска көрдөрөрүн, мэдиссиинэ өҥөтүн туһанарын туһугар, быраастар мобильнай биригээдэлэрин үлэлэтэбит”, – диэн миниистир Лена Афанасьева этэр.
