Ыам ыйын 29 күнүгэр Дьокуускай куораттааҕы суут судьуйата Эльвира Минеева урукку тыа хаһаайыстыбатын миниистирин солбуйааччы Василий Афанасьевы буруйдааҕынан аахта уонна бириигэбэр таһаарда. Василий Афанасьевка тэриллибит холуобунай дьыала туһунан биһиги суруйан турабыт.
Миниистири солбуйааччыны 13 сыл кытаанах эрэсиимнээх хаайыыга уураахтаатылар. Маны таһынан 30 мөл. солк. ыстараабы төлүөхтээх, 14 сыл устатыгар судаарыстыбаннай сулууспаҕа үлэлиирэ бобулунна. Бириигэбэр сокуоннай күүһүгэр киирэ илик, онон өрүттэр ааһыныахтарын сөп.
Бу бириигэбэр олус тыйыс буолла: хоруупсуйаҕа буруйданан хаайыллыбыт атын дьыалаларга холоотоххо, ыстарааба олус улахан.
Санатар буоллахха, Василий Афанасьевы 2021 сыллаахха ыам ыйын 24 күнүгэр бэриги ылыыга уорбалаан уонна дуоһунастаах боломуочуйатын аһара туһанна диэн туппуттара. Икки хонон баран СИЗО-ҕа утаарбыттара. Экс-миниистир солбуйааччытын тутар видеолара интэриниэтинэн күүскэ тарҕаммыта. Бу холуобунай дьыала Дьокуускай куораттааҕы суут көрүүтүгэр былырыын бэс ыйын 3 күнүгэр киирбитэ. Ити кэмтэн ыла уопсайа суут 29 мунньаҕа буолла.
Афанасьевка Арассыыйа ХК 258 ыст. 3 ч. (дуоһунастаах боломуочуйатын аһара туһаныы) уонна 290 ыст. 6 ч. (бэриги ылыы) холуобунай дьыалалары көбүппүттэрэ. Дьыаланы өрөспүүбүлүкэ борокуратуурата уонна ИДьМ экэнэмиичэскэй буруйу уонна хоруупсуйаны бохсор управлениетын үлэһиттэрэ ыыппыт бэрэбиэркэлэрин түмүгүнэн тэрийбиттэрэ.
Силиэстийэ быһаарбытынан, 2018 сыллаахха Василий Афанасьев Хаҥалас улууһун тыа хаһаайыстыбатын потребительскай кэпэрэтиибэ субсидия ылаары ыыр үүтүн кумааҕыга соруйан үрдэтэ олорбутун билбит. Онуоха материальнай баайын хаҥаттаары, кэпэрэтиип дириэктэригэр субсидияны түөкүннээн ыларын кистээн олороругар уонна субсидияны сокуоннайа суох ыларыгар көмөлөспүтүн иһин бэрик көрдөөн ылбыт. Түмүгэр кэпэрэтиип бүддьүөттэн сокуоннайа суох 40 мөл. солкуобайтан тахсаны ылбыт. 2018–2021 сылларга миниистири солбуйааччы кэпэрэтиип дириэктэриттэн тус хаартатыгар 1,1 мөл. солк. бэриги ыыттарбыт.
Маны таһынан бэрэбиэркэ быһаарбытынан, чунуобунньук баанын хаартатыгар 2018–2020 сс. атын счёттартан 15,9 мөл. солк. киирбитэ биллибит. Онуоха ити туһунан миниистир солбуйааччыта кистээбит, дохуотун отчуоттуур декларациятыгар көрдөрбөтөх. Дуоһунастаах киһи уонна кини дьиэ кэргэнин чилиэннэригэр ити суума ханан да ыйыллыбатах.
Василий Афанасьев тыа хаһаайыстыбатын миниистирин солбуйааччытын дуоһунаһыгар 2018 сыллаахтан анаммыта. Киниэхэ холуобунай дьыала тэриллээтин кытары үлэтиттэн тута уураппыттара уонна СИЗО-ҕа ылан хаайбыттара.
Бэйэ кэр.
