Аҕа дойдуну көмүскээччи күнүн түмүктүүр олунньу 24-с түүнүгэр Сунтаар улууһун Кутана сэлиэнньэтигэр дьулаан быһылаан таҕыста. Чааһынай дьиэлэртэн 34 саастаах эр киһи уонна 64 саастаах дьахтар өлүктэрин буллулар.
Эр киһини тимир ломунан төбөтүн хайа охсон, дьахтары сүгэнэн кэрдэн өлөрбүттэр. Өлөрүөхсүт, дьахтар дьиэтин уоттуу сатаан баран, чугастааҕы нэһилиэккэ күрээн испит, ол эрээри учаастактааҕы боломуочунайга тутуллубут.
Силиэстийэ быһаарбытынан, кини эр киһини тэҥҥэ арыгылаан баран өлөрбүт. Онтон саастаах дьахтарга тиийэн урукку өһүн ситиспит. Дьон кэпсээнинэн, хаайыыга олоруохтаах өлөрүөхсүт, анал байыаннай дьайыыларга кыттан, босхолонон баран дойдутугар кэлбит.
Мантан сиэттэрэн, хаайыыга олорор дьону анал байыаннай дьайыыларга ыытар төһө сөптөөҕүн туһунан кэпсэтии эмиэ сытыырхайда. Толкуйдаан да көрдөххө, итинник айгыраабыт майгылаах-сигилилээх дьон кыргыһыы хонуутуттан тупсан кэлбэттэрэ чахчы.
Онон, кинилэри уйулҕа өттүнэн үөрэтэн, туруктарын быһааран баран биирдэ онно-манна ыытар, босхолуур сөп буолсу.
Сонун төрдө: СӨ Силиэстийэлиир кэмитиэтэ
