Ыам ыйын 16 күнүгэр күнүс 11:30 чааска Дьокуускай куорат полициятын 3 N-дээх отделыгар «Sushidze» сулууспа дьиэтигэр кимнээҕэ биллибэт эр дьон киирэн уолаттары ытыалаан баран куоппутарын туһунан суһал иһитиннэрии кэллэ. Тэрилтэ дириэктэрэ тута полицияны ыҥырда.
ИДьМ үлэһиттэрэ Росгвардия үлэһиттэрин көмөтүнэн 29 уонна 30 саастаах эр дьону тутан полиция салаатыгар илтилэр. Кинилэртэн травматическай бистэлиэттэри уонна эрэһиинэ буулдьалары былдьаатылар. Хата, дьолго, "гангстердар" кими да өлөрбөтөхтөр. Бигэргэнэ илик иһитиннэриинэн, мөккүөр төрүөтүнэн ытыллыбыт 19 саастаах уолаттар (сулууспа үлэһиттэрэ эбиттэрэ дуу?) саба түһээччилэр дьахталларын кытта түүҥҥү кулууп аттыгар атааннаһыылара буолбут. Онон, «гангстердар» дьахталларын үҥсүүтүнэн кэлэн ытыалаабыт курдуктар.
«Sushidze» сулууспа Бестужев-Марлинскай уул. 54а дьиэтигэр баар. Аттыгар «Number one» диэн кытайдыы кулууп-эрэстэрээн үлэлиир. Сулууспа дириэктэрэ полицияҕа сайабылыанньа суруйда.
Сонун төрдө: ИДьМ пресс-сулууспата
