Бүгүн, балаҕан ыйын 4 күнүгэр, Уопсай юрисдикциялаах 9-с Кассация суута (Владивосток к.) Анатолий Чомчоев тыыныгар тура сатаабыт Дмитрий Ермолов үҥсүүтүн көрдө. Саба түһээччи, көҥүлгэ тахсаары, албын-көлдьүн ньымаларын туһана сатаата да, сатаммата. Судьуйа уонна борокуруор кини албакаатын этиитин ылымматылар. Онон, бандьыыт хаайыыга олоруохтаах 3 сылын ситэри олорор буолла.
Дьыаланы кассацияҕа көрүү видео-кэмпириэнсийэ сибээһинэн Дьокуускай куорат суутун дьиэтигэр ыытылынна. Анатолий Игнатьевич уолун кытта, буоларын курдук, бэрт холку көрүҥнээхтэр. Дьиҥэр, бу быһылаантан, икки сылтан ордук сууттарынан соһуллууттан төһөлөөх санааҕа-онооҕа ылларбыттара, төһөлөөх сылайбыттара буолуой? Эбиитин, саба түһээччи Ермолов албакаата Осодоевтыын «саанан ытан улаханнык эчэппит уонна өлөр өлүүгэ бырахпыт» Чомчоевка икки холуобунай дьыаланы тэрийтэрэннэр кэлии-барыы билигин да тохтуу илик.
Анатолий Игнатьевиһы Кассация суутугар уонна Үрдүкү суукка ситиһиилээхтик көмүскээбит албакаат Николай Кысылбаев, саба түһээччи буруйа дакаастаммытын кэннэ итинник холуобунай дьыала тэриллиэ суохтааҕын, ол туһунан Генеральнай борокуратуураҕа хадаатайыстыба суруйбутун иһитиннэрдэ. Онон, буруйданааччы өттүттэн Анатолий Чомчоевы сойуолаһыы сотору тохтуо диэн эрэнэбит.
Оттон биһиги, барыта баҕабыт хоту эбитэ буоллар, бандьыыт Ермоловтан икки сылтан ордук кэм устата ыал нус-хас олоҕун аймаабытыгар, кырдьаҕас дьон туругун ыспытыгар, үлэтин-хамнаһын харгыстаабытыгар, уйулҕаларыгар улахан охсууну оҥорбутугар мөлүйүөнүнэн харчыны төлөтөн, Чомчоевтар туруктарын тупсарыыга, айар-тутар үлэлэрин сайыннарыыга ыытыах этибит. Хомойуох иһин, оннук буолбат. Анатолий Игнатьевич уонна биһиги туруулаһыыбыт сүрүн соруга – кырдьыгы булуу, най барбыты оннун булларыы.
Суут мунньаҕын сырдатта КҮНДЭЛИ.
