Балаҕан ыйын 15 күнүгэр киин куорат Жорницкай-Семён Данилов уулуссаларын быһа охсуутугар сибэкки уурбуттар. Манна үс сыллааҕыта ЯСИА ааҕыныстыбаҕа, "Эхо столицы", "Ил Тумэн" хаһыаттарга үлэлээбит талааннаах суруналыыс, икки оҕо күн-күбэй ийэтэ Татьяна Васильева (Симакова) олоҕо олус хомолтолоохтук, соһумардык быстыбыт. Ол туһунан нууччалыы тыллаах ситимнэр Пряная Якутия, Якутск Вечерний, Сахапресс уонна да атыттар элбэхтик суруйбуттара.
Бэлэсипиэтинэн дьиэтигэр, оҕолоругар баран испит Татьянаны үлтү көппүт манипулятор суоппара Антипин холуобунай дьыалаҕа тоҕо эрэ туоһу быһыытынан кыттыбыт. Силиэстийэ хара маҥнайгыттан бу киһини буруйа суох оҥорор соруктаах ыытыллыбытын туһунан аймах дьоно кэпсииллэр. «Кини ИДьМ тиһигэр үлэлиир хайа эрэ тойон туга эрэ» диэн сурахтар эмиэ бааллар. Баҕар, ол иһин 2023 сыл ахсынньы 9 күнүгэр Дьокуускай куорат суута холуобунай дьыаланы «буруйу оҥоруу састааба суоҕунан» сабарга уураах таһаарбыта буолуо.
Ол эрээри, Татьяна чугас дьоно үрдүкү инстанцияларга үҥсүү суруйаннар, бу сыл атырдьах ыйын 1 күнүгэр ити уураах суутунан көтүллэн холуобунай дьыала саҥаттан көбүтүллүбүтэ. Онон, силиэстийэ атыннык ыытыллан, быһылаан дьиҥнээх хартыыната ойууланыа диэн эрэнэбит. Кыһыыта диэн, суруналыыс Татьяна кырдьыгын буларга кэллиэгэлэрин дьайыыта кыра буолан биэрдэ. Ити курдук, дьыала төһө да сырдатыллыбытын иһин, бастакы инстанциялаах суут-сокуон үлэһиттэрин үрдүкү эрэ инстанция дьарыйар, уодьуганныыр кыахтаах.
Бэйэ кэр.
