Бу күннэргэ Москубаттан 60 кг синтетическэй наркотигы Дьокуускайга аҕалан тарҕаппыт СӨ Силиэстийэлиир кэмитиэтин силиэдэбэтэлэ тутуллубутун туһунан сонун тарҕанна. Ол эрээри, сотору буолаат, тас дойдуга күрээбит сураҕа иһилиннэ. Кини кимин уонна буруйу кимнээҕи кытта оҥорбутун Сахадэй аан ситим быһаарда.
Наркотигынан эргиммит силиэдэбэтэл аата Евгений Мосов диэн эбит. Кини урут силиэстийэлиир кэмитиэттэн уурайан баран ыҥырыллан төттөрү киирбит. Кыралаан урбаанынан уонна көҥүл тустуунан дьарыктаммыт. Урбааҥҥа табыллыбакка, хараҥа дьыаланы ылыстаҕа диэн сабаҕалыыллар.
Кинини кытта наркотигынан успуорка сыһыаннаах икки ыччат дьарыктаммыт курдук. Бу Саха сиригэр чэпчэки ыйааһыҥҥа ММА чөмпүйүөнэ Казимир Захаров уонна көҥүл тустууга кэккэ ситиһиилэрдээх, урут наркотиктан сылтаан успуортан туоратылла сылдьыбыт Семен Семенов диэн суруйаллар.
Быраабы көмүскүүр уорганнар кырдьыктаах иһитиннэриини таһаара иликтэр. Онон, ааттаммыт дьон буруйдара дакаастана илигин бэлиэтиибит. Бу кэмҥэ Семенов буруйун билиммит үһү диэн сурах тарҕанна.
Хаартыскаҕа: Евгений Мосов уонна Казимир Захаров. Сахадэй аан ситимтэн
