Бөөлүүн түүн Доннааҕы Ростов куоракка быһахтаах киһи дьахталларга уонна оҕолорго саба түстэ. Дьон өллө. Олортон биирдэстэрэ биһиги биир дойдулаахпыт, 21 саастаах Ульяна О.
Ульяна оскуолатын бүтэрэн баран Ростов куоракка көһөн тиийбитэ үс сыл буолбут. Кыыс үлэлиир, Ростовтааҕы мэдиссиинэ судаарыстыбаннай университетыгар үөрэххэ туттарсар баҕалаах эбит.
Владислав Кузнецов диэн сиэхсит Ульянаҕа Венера уулуссатыгар турар дьиэ подъеһыгар саба түспүт. Уонтан тахсата быһаҕынан анньыллыбыт кыыс балыыһаҕа киирэн өлбүт. Ол туһунан “Mash” телеграм-ханаал суруйар.
Ростов уобалаһын Аксайскайдааҕы оройуонун ИДьМ-гар кыыска быһахтаах киһи саба түспүтүн туһунан олохтоох дьахтар иһитиннэрбит. Миэстэтигэр тута полиция уонна суһал көмө үлэһиттэрэ тиийбиттэр эрээри, кыыс олоҕо уһаахтаабатах. Балыыһаҕа киирэн быстыбыт.
Ити кэннэ сотору буолан баран, өссө биир саба түһүү буолбутун туһунан иһитиннэрии киирбит. Бу сырыыга сиэхсит оҕону быһахтаабыт. Сокуоннай сааһын ситэ илик уол утарыласпытыгар, Кузнецов куоппут. Уол тыыннаах хаалбыт, быраастар көрбүттэр-истибиттэр.
Тустаах уорганнар сиэхсит дьүһүнүн-бодотун, таҥаһын-сабын ойуулаан полиция үлэһиттэринэн тарҕаппыттар. Ол түмүгэр, буруйдаах аҕыйах чааһынан тутуллубут. Ити туһунан ИДьМ бэрэстэбиитэлэ Ирина Волк иһитиннэрэр.
Кэлин быһаарбыттарынан, Доннааҕы Ростовка дьоҥҥо саба түспүт киһи төбөтүнэн ыалдьара биллибит. Урут уоран сууттана сылдьыбыт эбит. Ол туһунан ТАСС суруйар.
