Ингушетия олохтооҕо киһи Саха сирин нөҥүө Хотугу Кавказска барыта 105 мөлүйүөн солкуобайдаах 17 кутуу көмүһү уоран илдьэ бараары түбэстэ.
50 саастаах Ингушетия олохтооҕо ааспыт сайын бэс ыйыгар “Ниссан Кашкай” массыынан Магадаан уобалаһыгар көҥүлэ суох көмүһү атыылаһаары айаннаан тиийбит. Биллиҥҥитэ кимнээҕэ биллибэт дьонтон бэйэ оҥоһуута кутуу көмүстэри атыыласпыт.
Түөкүн массыына куусабын анныгар тимири сыбааркалаан көмүһүн кистиир анал сир оҥостубут. Онтун киһи хараҕар быраҕыллыбат гына шпаклевкалаабыт уонна кырааскалаабыт.
Ол гынан баран Саха сиринэн кэлэн ааһан истэҕинэ быраабы араҥаччылыыр уорганнар туппуттар. Хас биирдиитэ биирдии киилэлээх, барыта 105 мөлүйүөн суумалаах 17 кутуу көмүһү былдьаабыттар.
Эр киһи дьыалата суукка утаарыллыбыт. Буруйа дакаастаннаҕына (ону киһи саарбахтаабат), биэс сылга диэри хаайыллыан сөп. Оттон көмүһү судаарыстыбаҕа туттарбыттар.