Уоран мас кэрдэн тутуллубут кырдьаҕас хас да киһини өлөрөн баран, бэйэтигэр тиийиммит.
Калуга уобалаһын Куйбышев оройуонун Усохи бөһүөлэгин олохтооҕо, 64 саастаах киһи Брянскай уобалас кыраныыссатын таһыгар көҥүлэ суох балачча маһы кэрдибит. Быһылаан тахсар быатыгар, ону Куйбышевтааҕы лесничество үлэһиттэрэ билэннэр, бэһиэ буолан (түөрт эр киһи уонна биир дьахтар – инженер) мас кэрдээччи дьиэтигэр тиийбиттэр.
Хомойуох иһин, кырдьаҕаһы кытта кэпсэтэр кыаллыбатах. Лесниктэр массыыналарыттан түһээттэрин кытта, эр киһи тута саанан ытыалаабыт, үс киһини миэстэтигэр охторбут – оройуоннааҕы лесничество дириэктэрин солбуйааччыта Алексей Агеев, суоппар Геннадий Багачев уонна лесник Виктор Чугунов сонно тыыннара быстыбыт. Ол кэннэ эр киһи тыыннаах хаалбыт Алексей Агеев уола Дмитрийи уонна инженер Людмила Никитинаны дьиэтигэр соһон киллэрэн, наручнигынан хам кэлгийбит, таһырдьа хаалбыт массыынаҕа көрүүчэй ыһан, уоттаан кэбиспит. Өлөрүөхсүт аралдьыйбыт кэмигэр, хата, дьахтар полицияҕа эрийбит. Ол эрээри полиция үлэһиттэрэ бөһүөлэккэ айаннаан кэлиэхтэригэр диэри буруйдаах хам хараҕаланан олорор дьону босхолообут уонна бэйэтигэр тиийиммит.
Быһылаан түмүгүнэн силиэстийэлиир-оперативнай бөлөх уонна борокуратуура үлэлииллэр. Анал психиатрия эспэртиисэтэ ыытыллыахтаах.
“SHOT” ханаал суруйарынан, мас кэрдибит, бэйэтигэр тиийиммит киһи урут уоран Аҕа дойду сэриитин саҕанааҕы сааны-сэби көрдүүр дьарыктаах эбит. Норуокка биллэринэн, “чернай копатель”. Ол курдук, 2011 сыллаахха быраабы араҥаччылыыр уорганнар кини дьиэтиттэн Дегтярев бүлүмүөтүн, уоһа сарбыллыбыт Мосин бинтиэпкэтин, ППШ аптамааты, икки бэстилиэти, ону тэҥэ 100 сэнэрээти уонна 7 миинэни булан сууттуу сылдьыбыттар.