Бар дьоҥҥо киэҥник биллэр, ытыктанар уопсастыбанньык, эколог, учуонай Анатолий Чомчоевка бистэлиэттээх уонна быһахтаах саба түһүү тахсыаҕыттан үс сыл кэриҥэ ааста. Улахан туруулаһыы түмүгэр, буруйдаах Дмитрий Ермолов, холуонньаҕа утаарыллыбыта эрээри, Чомчоевтарга тугу да төлүү илик.
Кэмниэ-кэнэҕэс, Дьокуускай куорат суута Дмитрий Ермолов Анатолий Чомчоевка оҥорбут моральнай-материальнай охсуутун кээмэйин көрдө. Хомойуох иһин, суут 350 тыһ. солк. эрэ сууммалаах охсуу оҥоһуллубут диэн быһаарда. Анатолий Игнатьевич, эмиэ ыалдьан балыыһаҕа сытан тахсыбыт буолан, суукка кыайан кыттыбата. Онон, суут ВКС нөҥүө кыттыбыт Ермолов суланыытынан уонна албакаатын этиитинэн салайтарбыта сэрэйиллэр.
Кырдьаҕас киһи кырбаммыта, быһаҕынан анньыллыбыта, тыын уорганын таарыйтарбыта, хаанын сүтэрбитэ, эпэрээссийэлэммитэ, албакааттары наймылаһар кыһалҕаҕа киирбитэ, хас эмэ сылы быһа силиэстийэҕэ, суукка соһуллубута, дьиэни-уоту, үлэни быраҕан туран кэлбитэ-барбыта, сүөһүтүн эспитэ, ороскуотурбута, утуйар уута, аһыыр аһа ыһыллыбыта, доруобуйатын сүтэрбитэ ахсааҥҥа турбатах. Онон, биһиги суут киһини өлөрө сатаабыт Ермоловка таһаарбыт быһаарыытыгар уонна анаабыт суумматыгар сөбүлэспэппит.
Анатолий Игнатьевич этэринэн, Росгвардия массыынатынан «ыалдьыттаан ааспыт» Ермолов, билигин быраабы көмүскүүр уорган үлэһиттэрин тутар анал холуонньаҕа «ураты усулуобуйаҕа» олорор. Онон, сотору «үтүө» быһыытын-майгытын иһин көҥүлгэ таҕыстаҕына соһуйбаппыт...
Бэйэ кэр.