Мииринэйдээҕи эрэгийиэннээҕи тэхиньиичэскэй колледж устудьуона Украина анал сулууспаларын (СБУ) сорудаҕынан суотабай сибээс ыстаансыйатын уоттаабыт. Диверсия ыстатыйатынан холуобунай дьыаланы көбүттүлэр. Ол туһунан “РИА Новости” суруйар.
Быраабы араҥаччылыыр уорганнар иһитиннэрбиттэринэн, оптуорунньук киэһэ полицияҕа эр киһи эрийэн Мииринэй таһыгар суотабай сибээс ыстаансыйата умайа турарын туһунан иһитиннэрбит. Буруйдаах диэн уорбалаан 20 саастаах МРТК устудьуонун туппуттар.
“Украина СБУ-лара эдэр киһини кытта мессенджер көмөтүнэн суруйсубуттар уонна суотабай сибээс ыстаансыйатын уоттуур түгэнигэр 27 тыһыынча солкуобайы биэриэх буолбуттар” – диэн “РИА Новостига” уорган үлэһиттэрэ кэпсээбиттэр.
Ити дьайыытын иһин 20 саастаах устудьуон РФ Холуобунай кодексын 281 ыст. 10 сылтан 20-чэ сылга диэри хаайыллыан сөп.
