Муус устар 4 күнүгэр Ньурба улууһун Күндээдэ сэлиэнньэтигэр хайа эрэ фермер икки киһини хаайан олордон үлэлэтэрин, атаҕастыырын, биирдэстэрэ күрээн көмө көрдүү ыалга тиийбитин туһунан иэдээннээх сурах тарҕанан барыбытын долгутта.
Дьон үксэ "Ама, тыа сиригэр оннук сидьиҥ санаалаах садистар, фашистар суохтар ини" диэн итэҕэйиэн баҕарбатаҕа. Ол эрээри үлэһит уолу быыһаабыт дьахтар аудионан кэпсээнин иһиттэххэ, дьиҥнээххэ майгынныыра. Сотору буолаат, силиэстийэ саҕаланан, фермер тутуллубутун, иккис киһини сыаптан бсохолообуттарын туһунан сурах тарҕаммыта. Кэмниэ-кэнэҕэс, силиэстийэлиир кэмитиэт салайааччытын ыстаарсай көмөлөһөөччүтэ Надежда Дворецкая иһитиннэриитэ тахсан, туга-ханныга кэм билиннэ.
Ол курдук, силиэстийэ быһаарбытынан, 30 уонна 51 саастаах эр дьон көҥүлгэ, үлэҕэ уонна киһилии олоххо бырааптара күөмчүлэммит. Кинилэри тутулуктаах оҥорон кулуттааһын туругар киллэрбиттэр. Биирин ханна да барар кыаҕа суох оҥорон баран сүөһү көрүүтүгэр сырыттыннарбыттар уонна киһиэхэ сөбө суох усулуобуйаҕа олордубуттар. Иккиһэ дьиэҕэ олорбут эрээри, үлэтин бүтэрэн баран сарсыарда күрээн ыалга көмө көрдүү тиийбит.
Онон, СӨ Силиэстийэлиир кэмитиэтэ РФ ХК 127 ыст. 2 ч. «а», «г» пууннарынан күүһү туһанан уонна куттаан икки киһини кулут оҥорон үлэлэтии иһин холуобунай дьыала тэрилиннэ. Онуоха, буруйданааччы биир дойдулаахтарыгар сорох дьон атын санаалаахтар. Оттон биһигини биир ыйытыы долгутар: Бүтүн сэлиэнньэ үрдүнэн итини хайдах биир да киһи билбэтэҕэй?
Бэйэ кэр.
