“Ethiopian Airlines” авиахампаанньа Boeing 737 сөмөлүөтэ Кенияҕа көтөн иһэн суулунна.
Сөмөлүөккэ 149 пассажир уонна аҕыс экипаж чилиэннэрэ баара биллэр. Бу туһунан авиахампаанньа бэрэстэбиитэлэ иһитиннэрэр. Сөмөлүөт аэропортан олохтоох бириэмэнэн 08:38 ч көппүт уонна 08:44 ч кинилэри кытта сибээс быстыбыт. Көтөр аал Бишофту куорат аттыгар сууллубут.
Билигин сөмөлүөт сууллубут сиригэр көрдүүр-быыһыыр үлэ ыытыллар. Эфиопия премьер-миниистирэ Абий Ахмед Али социальнай ситим нөҥүө сүтүктээхтэргэ кутурҕанын биллэрбит.
