От ыйын 8 күнүгэр “Халыма” федеральнай суол 325-с км суол саахала таҕыста. Бу туһунан ГИБДД пресс-сулууспата иһитиннэрэр.
1949 сыллаах төрүөх эр киһи “БМВ” матасыыкылынан Дьокуускайтан Томпо улууһун Хаандыга бөһүөлэгэр айаннаан иһэн, матасыыкылын кыайан салайбакка утары испит “Скания” массыына прицебыгар түспүт. “Скания” массыынаны 1982 сыллаах төрүөх эр киһи ыытан испит. Матасыыкыл суоппара миэстэтигэр тыына быстыбыт. “Скания” массыына суоппара медицинскэй туоһулааһын көрдөрбүтүнэн өйдөөх сылдьыбыт.
Томпо улууһун дьаһалтата иһитиннэрбитинэн, өлбүт киһи Великобритания олохтооҕо эбит. Кини уонна өссө биир турист Владивосток — Магадан хайысханан матасыыкылынан айаҥҥа туруммуттар. Кинилэри Москубатааҕы туристическай фирматтан үс киһи массыынанан арыаллаан испиттэр. Иккис турист уонна туристическай фирма бэрэстэбиитэллэрэ саахалга түбэспэтэхтэр.
