Арассыыйа Силиэстийэлиир кэмитиэтин Саха сиринээҕи Управлениетын Ньурбатааҕы оройуоннар икки ардыларынааҕы силисэтийэлиир салаата Сунтаар улууһун Илимниир нэһилиэгин социальнай-култуурунай киинин урукку дириэктэригэр тэрийбит дьыалатын суут көрүүтүгэр ыыппыта. Урукку дириэктэр Арассыыйа ХК 160 ыст. 3 ч., 292 ыст. 2 ч. (эппиэтинскэ бэриллибит баайы-дуолу иҥэринии, сулууспатын туһанан албыннааһын) сууттанна.
Силиэстийэ уонна суут быһаарбытынан, уорбаланааччы кулууп өрөмүөнүгэр диэн ааттаан, 2012 сыл ахсынньытыгар уонна 2013 сыл балаҕан ыйыгар сымыйа официальнай докумуоннары уган, бүддьүөт харчытыттан 664700 солк. аймаҕын счетугар ыыппыт уонна ону бэйэтин көрүүтүнэн туһаммыт. Ону даҕаны ханнык да кулууп өрөмүөннэммэтэх, сыбыс-сымыйаннан харчыны сиэри соруйан оҥорбута биллибит. Инньэ гынан, Илимниир нэһилиэгин бүддьүөтүгэр балай да хоромньу тахсыбыт.
Сууттанааччы буруйун толору билиммит уонна барыллаан силиэстийэ кэмигэр уорбут харчытын сороҕун төннөрбүт.
Балаҕан ыйын 23 күнүгэр Сунтаардааҕы оройуоннай суут уорбаланааччы буруйун толору дакаастаата уонна 300 тыһ. солк. ыстырааптаата.
