“Саханефтегазсбыт” тэрилтэ урукку генеральнай дириэктэрэ, Ил Түмэн урукку дьокутаата Игорь Никитин дуоһунастаах болмуочуйатын аһара түһүүгэ уонна бөдөҥ сууманы түөкүннээн сиэһиҥҥэ уорбаланар.
Бэрэбиэркэни борокуратуура, ИДьМ уонна ФСБ Саха сиринээҕи управлениета тэрийбиттэр.
СӨ Борокуратууратын пресс-сулууспата иһитиннэрэринэн, 2018 сыллаахха “Саханефтегазсбыт” уонна “СИС” ХЭУо урут 29 мөл. солк. тахсаҕа түһэрсиллибит харчыны иэс ылыыга дуогабарыгар төлөбүрү төнүннэрэр туһунан сөбүлэҥи түһэрсибит. Онуоха ньиэп-гаас хампаанньатыгар дьиҥнээҕитэ 12 мөл. суумалаах баайы-дуолу 30 мөл. солк. сыаналаан тиэрдибиттэр. Бэрэбиэркэ матырыйаала көрдөрөрүнэн, ити төлөбүрү төннөрөр сөбүлэҥ (18 мөл. солк. дылы кыччатан туран) Игорь Никитин интэриэһигэр, онуоха “Норд-Спецстрой-1” ХЭУо генеральнай дириэктэрэ киксээһиннээх оҥоһуллубут.
Маны таһынан,бэрэбиэркэ көрдөрбүтүнэн, Игорь Никитин куомуннаах тэрилтэтин дириэктэрин кытары “Саханефтегазсбыт” АУо буҕалтыарыйатыгар 59 мөл. солк. суумаҕа икки нэһилиэккэ АЗС туппуттарын туһунан сымыйа докумуону биэрбит. Борокуратуура ити бэрэбиэркэтин түмүктэринэн силиэстийэ уорганнарыгар холуобунай дьыалата тэрийиҥ диэн көрдөспүт.
Инньэ гынан, Игорь Никитиҥҥэ Арассыыйа ХК 285 ыст. 3 ч. (улахан хоромньуга тиэрдэн туран дуоһунаһын аһара туһаныы) уонна Арассыыйа ХК 159 ыст. 4 ч. (бөдөҥ суумаҕа түөкүннээһин) холуобунай дьыалалары көбүппүт. Оттон “Норд-Спецстрой-1” ХЭУо генеральнай дириэктэригэр Арассыыйа ХК 285 ыст. 3,5 ч. (дуоһунастаах боломуочуайатын аһара туһаныыга куомуннаһыы) уонна 159 ыст. 4 ч. (масыанньыктааһын) дьыалалары тэрийбиттэр. Билигин бу чахчыларынан силиэстийэлиир дьаһаллар ыытыллаллар, дьыаланы өрөспүүбүлүкэ борокуратуурата хонтуруолга ылбыт.
