Сунтаар улууһугар 26 саастаах, бэйэтин “норуот эмчитэ” дэнэр дьахтарга, массыанньыктааһын ыстатыйанан холуобунай дьыала тэриллибит. Бу туһунан СӨ ИДьМ пресс-сулууспата иһитиннэрэр.
Полицияҕа Эдьигээн улууһун олохтооҕо дьахтар сайабылыанньа суруйбут. Уорбаланааччы бассаап нөҥүө үгүс ыарыыны эмтиир күүстээх, харчы тардан кыһалҕалары быһаарар кыахтаах, ыраастаныы сиэрин-туомун оҥорор “норуот эмчитэ, экстрасенс” буоларын туһунан иһитиннэриини тарҕаппыт.
Эмсэҕэлээбит дьахтар бу иһитиннэриини көрөн баран, доруобуйатын тупсараары уонна харчыланаары “норуот эмчитин” өҥөтүнэн туһанарга быһаарыммыт. Ол курдук араас ритуаллары оҥоттороору 200 000 солк ыыппыт. “Экстрасенс” эрэннэрбитин күүппүт да туох да туолбатах.
