Арассыыйа Силиэстийэлиир кэмитиэтин Саха сиринээҕи управлениетын Ньурбатааҕы оройуоннар икки ардыларынааҕы силиэстийэлиир салаата Ньурба куоратын 34 саастаах олохтооҕор Арассыыйа ХК 111 ыст. 4 ч. (соруйан киһини кырбаан өлөрүү) холуобунай дьыаланы көбүттэ.
Барыллаан силиэстийэ быһаарбытынан, хас да күн устата 5 эр киһи уонна 3 дьахтар биирдэстэригэр мустан арыгылыы сылдьыбыттар. Муус устар 7 күнүгэр дьахтар сэрэппэккэ эрэ бииргэ аһыы олорбут эр киһи төлөппүөнүттэн 2 тыһ. солк. атын дьахтар нүөмэригэр мобильнай баанынан бырахпыт.
“Ол харчынан арыгы уонна ас ылбыттар. Онтон кыыһыран, киһилэрэ дьахтар үрдүгэр түспүт уонна сутуругунан, итиэннэ мас миинньигинэн этигэр-сиинигэр, баһыгар хаста да ыар охсуулары оҥорбут”, - диэн СК иһитиннэрэр.
Ылбыт эчэйиилэриттэн дьахтар нөҥүө күнүгэр балыыһаҕа өлбүт.
Уорбаланааччы буруйун тута билиммит уонна быһылаан хайдах тахсыбытын туһунан көрдөрүү биэрбит. Силиэдэбэтэллэр уорбаланааччы бу иннинэ эмиэ илиитигэр ону-маны ылан киһини кырбаан сууттана сылдьыбытын быһаарбыттар.
Муус устар 12 кинигэр уорбаланааччыны тутан хаайбыттар. Сотору кэминэн киниэхэ буруйдааһыны официальнайдык биэриэхтэрэ. Холуобунай дьыала чэрчитинэн туһааннаах силиэстийэлиир дьайыылар, эспэртиисэлэр оҥоһуллаллар.
