Ыам ыйын 17 күнүгэр Быыһыыр сулууспаҕа Нерюнгри куорат олохтооҕо дьахтар эрийэн, кэргэнэ доҕотторун кытта Нагорнай бөһүөлэк аттыгар Тимптон өрүскэ бултуу барбытын уонна дьэтигэр кэлбэтэҕин туһунан эппит. Бу туһунан биэдэмистибэ пресс-сулууспата иһитиннэрэр.
Булчуттары көрбүт дьон кэпсииллэринэн, үс эр киһи 200 кг уйуктаах, ураты эрдиилээх эрэһиинэ тыынан Тимптон өрүһү туораары оҥосто сылдьыбыттар. Кинилэр быыһыыр сэлиэччиктэрэ суох батарантаастарын, сааларын кэтэн баран тыыга олорбуттар. Сүүрүгэ күүстээх буолан нөҥүө биэрэккэ кыайан тиийбэтэхтэр. Оттон-мастан тутуһаары тыыларын түҥнэри эргиппиттэр. Биир киһи биэрэккэ тахсыбыт.
Быыһааччылар быһа холоон 1200 м аллараа биир эр киһи өлүгүн булбуттар. Иккис киһини көрдүүллэр.
“Өрүс уута болоорхой, сүүрүгэ олус күүстээх уонна туолан турар буолан көрдүүргэ ыарахан. Муус баран бүппүт, онон муус биэрэккэ эрэ баар”, — диэн Нерюнгритааҕы быыһыыр этэрээт начаалынньыга Анатолий Гежа иһитиннэрэр.
Быыһааччылар булчуттарга уонна балыксыттарга сөптөөх уйуктаах тыылары туһаналларыгар уонна быыһыыр сэлиэччиги эбэтэр аналлаах тимирбэт көстүүмү кэтэллэригэр сүбэлииллэр.
