ХИФУ преподавателигэр устудьуоннартан бэрик ылбытын иһин холуобунай дьыала тэриллибитин туһунан иһитиннэрбиттэрэ.
Университет пресс-сулууспата суруйарынан, бэриги ылааччы ХИФУ устудьуоннарыттан буолбакка, чааһынай юридическэй колледж устудьуоннарыттан бэрик хомуйбут. Ону колледж устудьуоннара үҥсүбүттэр.
“Горнай институт преподавателэ устудьуоннартан бэрик ылан тутуллан, дьиэ хаайыытыгар утаарыллыбыт. Кини университет устудьуоннарыттан буолбакка, чааһынай үөрэх кыһатын – Дьокуускайдааҕы юридическэй полиция колледжын устудьуоннарыттан ылбыт. Кини онно университекка сүрүн үлэтин таһынан лиэксийэлэри аахпыт”, - диэн Горнай институт дириэктэрэ Николай Овчинников иһитиннэрэр. Уорбаланнаачы университекка ыстаапка аҥарыгар үлэлиир. Билигин бэриги ылыыга 4 эпизодка уорбаланар. “Биһиги кэлэктиибинэн бу киһини ууратар туһунан быһарыныыны ыллыбыт. Университет уонна институт силиэстийэҕэ көмөлөһөргө бэлэм”, - диэн Овичинников тоһоҕолуур. Уорбаланааччы былырыын ахсынньыттан бу дьыл ыам ыйыгар дылы эксээмэни туттарыы иһин устудьуоннартан бэриги ыла олорбутун туһунан силиэстийэ сабаҕалыыр.
