Киир

Киир

ИДЬМ пресс-киинэ иһитиннэрэр – Түөкүттэр суотабай төлөппүөнүнэн эрийэн дьону албыннаан, харчы уорар албастара күн-түүн араас кубулҕаттарынан байан, чочуллан «мастарыстыбыалара» күн-түүн күүһүрэн иһэр.

Ол курдук бу күннэргэ Дьокуускай куорат 37 саастаах олохтооҕо уоруйахтар угаайыларыгар киирэн биэрэн 410 тыыһынча харчытыттан олоччу матта. Силиэстийэ быһаарбытынан биллибэт киһи эрийэн баан үлэһитинэбин диэн бэйэтин билиһиннэрбит, уонна үтүө санаанан салайтаран эйигин быыһаары эрийдим дэммит. Кини этэринэн, хара санаалаах дьон кини аатыттан кирэдиит ылан эрэллэрин баан көмпүйүүтэр систиэмэтэ быһаарбыт. Ону тохтотор туһуттан кини ол харчыны устан баран, кыра-кыра чаастарынан “куттала суох баан анал усчуотугар” ыытыахтаах эбит. Ол тоҕо бытарытан ыытабын диэн дьиибэргээбитигэр, ыстараап саансыйата ааҕыллыбатын туһуттан диэн туруупка аннараа өртүгэр быһаарбыттар.

Эмсэҕэлээччи саарбахтаабатын туһуттан, сотору буолаат, атын нүөмэртэн “полиция үлэһитэбин” диэн биир киһи эрийэ сылдьыбыт уонна «баан үлэһиттэрин” кытары биир ситимҥэ үлэлэһэ сылдьарын бигэргэппит итиэннэ баан үлэһиттэрин туох баар ыйар-кэрдэр сүбэлэрин толорорго сүбэлээбит. Утаакы буолбатах, “баан үлэһитэ» эрийэн, киһини итэҕэлгэ киллэрэн, эмсэҕэлээччи түөкүттэр туох диэбиттэрин барытын толорбут. Түмүгэр – 410 тыыһынча солкуобайга хорумньуга түбэспит.

Убаастабыллаах гражданнар! Ким эмитэ албын, ньуолбар эбэтэр дьоһун түс-бас куолаһынан эрийэн, полиция биитэр баан үлэһитэбин диэн бэйэтин билиһиннэрэн, эһиги усчуоккутугар саарбах эпэрээссийэлэр тэриллэн эрэллэр диэн эттэҕинэ, букатын итэҕэйимэҥ!

Өйдөөҥ, баан уонна полиция үлэһиттэрэ хаһан даҕаны киһиттэн тус бэйэтин туһунан информация ирдиир бырааптара суох, ханнык да эппэрээссийэни төлөппүөн нөҥүө оҥорботтор. Барыта дьиҥнээхтии оҥоһуллар буоллаҕына тус офиска, сирэй сирэйгэ, илэ, пааспаргын ылан баран оҥоһуллар.

Булгуччу бэйэҕит чугас аймах-билэ дьоҥҥутугар, доҕотторгутугар маннык албыннааһын көрүҥэ олус тэнийбитин уонна кутталлааҕын туһунан тиэрдиҥ.

Тарҕат:

Санааҕын суруй

Бүтэһик сонуннар