Дьокуускай куорат полициятын отделыгар эдэр кыыс сайабылыанньа суруйда, киниэхэ төлөппүөнүгэр түөкүн эрийэн угаайыга киллэрэ сатаабытын.
Киэһэ, кини массыынатыгар сынньана олордоҕуна, билбэт нүөмэриттэн кини суотабай төлөппүөнүгэр ким эрэ эрийбит. Билбэт эр киһитэ бэйэтин миэбэл маҕаһыынын атыыһытынан билиһиннэрбит, уонна алҕас эһиги дьыбаан атыыласпатаххыт дуо диэн интириэһиргээбит. Кыыс ууга-уокка түспэккэ хата тута сэрэйбит, түөкүнү кытары кэпсэтэрин, уонна утары мас-таас курдук ыйыппыт: «Сирэйгит сааппат дуо, дьону албынныыргытыттан, бүтэһик харчыларын уораргытыттан!?»
Онуоха, түөкүн кистэнэ сылдьыбыт «албын сирэйин» саралыы тардаат кинини кытта тыл бырахсан, саҥарсан барбыт. Аһаҕас кэпсэтиигэ кини баллаччы билиммит дьону албынныырын, хайдах курдук сүүрбэччэ эрэ мүнүүтэ иһигэр албыннаан баһаам харчы оҥосторун киһиргээн чабыламмыт. Туруупка аннараа өртэр кэпсэтэр «эр киһи» (маннык аатыаҕы табыллыбат курдук) бу дьайыыларын өссө киэргэтэн – күүс өртүнэн талаабакка, өй күүһүнэн атын дьон хармааныттан харчыны “хайыһардатыынан” аахпыт. Бүтэһигэр, түөкүн дьон хайдах курдук акаарыларын, кэнэннэрин сөҕөрүн күлэн сэтэрээбит уонна туруупкатын «талыр» гына бырахпыт.
Саха сиринээҕи ИДЬМ пресс-киинэ иһитиннэрэр:
-Убаастабыллаах Саха сирин олохтоохторо! Өскөтүн, эһиэхэ суотабай төлөппүөҥҥүтүгэр түөкүн эрийэрин сэрэйдэххитинэ, тута аудиоҕа устаҥҥыт, биһиэхэ электроннай аадырыспытыгар ыытар буолуҥ: Этот адрес электронной почты защищён от спам-ботов. У вас должен быть включен JavaScript для просмотра. Ким сэрэтиллибит – ол кыайар. Эһиги сэрэхтээх буолуугут - атын дьоҥҥо үтүө холобур буолуоҕа угаайыга киирэртэн быыһыаҕа. Биһиги бу түбэлтэлэри «Кинилэри түөкүттэр кыайбатахтара» рубрикаҕа бэчээттиэхпит.
Өрөспүүбүлүкэбит олохтоохторун, бу курдук сэрэхтээх, өйдөөх биир дойдулаахтарбытыттан үтүө холобур ыларгытыгар баҕарабыт.
