Киир

Киир

 

«Сахапроект» ААУо сүрүн дириэктэрэ Аркадий Габышев үлэһиттэригэр хамнас төлүүртэн куотуна сылдьыбыт итиэннэ силиэстийэҕэ утарсыбыт. Ол туһунан Саха сиринээҕи Силиэстийэлиир кэмитиэккэ иһитиннэрдилэр, Габышевы борокоротуураҕа мунньах кэмигэр хайдах туппутарын быһааралларыгар.

Силиэстийэ быһаарбытынан, сүрүн дириэктэр тэрилтэ этэҥҥэ үлэлии турарын курдук тас көстүү эрэ оҥорбут. СК бэлиэтээбиттэринэн, кини хампанньа усчуотугар харчылааҕын билэ-билэ 11 ый тухары ( 2019 сыл сэтинньититтэн 2020 сыл алтынньытыгар диэри) аҕыс үлэһиттэригэр хамнастарын төлөөбөтөх. Уопсай төлөөбөтөх хамнаһын иэһэ биир мөлүйүөн солкуобай кэриҥэ буолбут.

Эрдэ ыытыллыбыт силиэстийэҕэ Габышев бэйэтин буруйун билиммит уонна иэһин сабарга туох баар миэрэ ылыах буолбут. Ону учуоттаан туран, киниттэн ханна да барбатын туһунан баппыыска ылбыттар уонна сиэрдээхтик сылдьарыгар ыйыбыттар.

«Силиэстийэҕэ утарар дьайыылары оҥорон, кини үлэһиттэригэр хамнас төлүүртэн араастаан куотунарын туһунан чахчылар биллибиттэр. 2021 сыл, муус устар 28 күнүгэр, Росгвардия ОМОН байыастарын көмөлөһүннэрэн Аркадий Габышев СКР силиэдэбэтэлинэн тутулунна, киниэхэ буруйдааһын ананна, кинини көҥүлүн быһарга докумуоннар бэлэмнэнэллэр», - диэн иһитиннэрдилэр Силиэстийэлиир Кэмитиэккэ.

Ону таһынан, кини бас билэр массыынатыгар – Lexus GX 460 арест уурулунна, итиэннэ «Сахапроект» ААУо усчуоттарыгар уонна киниэхэ бас бэринэр тэрилтэлэр усчуоттарыгар эмиэ.

«Сахапроект» ААУо сүрүн дириэктэрин Аркадий Габышевы Арассыыйа Холуобунай Кодексын 145.1. ыстатыйатын 2 чааһынан ( бэйэ интириэһин туһуттан тэрилтэ салайааччытынан икки ыйтан уһуннук толору хамнаһы төлөөбөт буолуу) буруйдаатылар. Бу ыстатыйанан муҥутуур накаастабыл – үс сылга диэри көҥүлү быһыы, анал дуоһунастарга үлэлиирин бобон туран.

«Сахапроект» ААУо архитектура эйгэтигэр үлэлиир. Хампаанньа ырыынакка 16 сыл тухары баар. Габышев тэрилтэни 2019 сылтан ыла салайар. Чуолаан, «Сахапроект» 203 микрооройуоҥҥа 360 миэстэлээх гимназияны бырайыактааһынынан дьарыктаммыт, 2021 сыллаахха балаҕан ыйыгар үлэҕэ киллэриллиэхтээҕэ хаалбыт.

Тарҕат:

Санааҕын суруй

Бүтэһик сонуннар